Prezident Qasym-Jomart Toqaev men Rim Papasy kelissóz júrgizgennen keiin «Qazaqstan» ortalyq kontsert zalynda azamattyq qoǵam jáne diplomatiialyq korpýs ókilderimen birlesken kezdesý ótkizdi, dep habarlaidy "Ult aqparat" Aqordaǵa silteme jasap.
Memleketimizdiń basshysy búgin elimiz úshin tarihi kún ekenin atap ótti.
– Rim Papasy Frantsisk Qazaqstanǵa alǵash ret apostoldyq saparmen keldi. Biyl Qazaqstan men Vatikan arasynda diplomatiialyq qatynas ornaǵanyna 30 jyl toldy. Sizdiń saparyńyz osy mereili mejege tuspa-tus kelip otyr. Biz bul saparǵa airyqsha mán beremiz. Sebebi búgingi kezdesý bizdiń túrli saladaǵy yntymaqtastyǵymyzdy jańa deńgeige kóteredi, – dedi Prezident.
Qasym-Jomart Toqaev adamzattyń igiligi jolyndaǵy Pontifiktiń qajyrly jáne tabandy kúsh-jigerin qoldady.
– Siz Qazaqstanǵa adamzat tarihyndaǵy betburys kezeńinde keldińiz. Túrli mádenietter men dinder ókilderiniń beibitshilik, áleýmettik úilesimdilik jáne ózara qoldaý kórsetý jolynda adamdardy biriktirý úshin danalyq pen kúsh-qýat kórsetetin ýaqyty jetti dep oilaimyn, – dedi Memleket basshysy.
Qazaqstan Prezidenti táýelsizdiktiń 30 jylynda elimiz «Birligimiz – áralýandyqta» qaǵidatyna negizdelgen ózindik etnosaralyq jáne dinaralyq kelisim modelin qalyptastyrǵanyn atap ótti.
– Búginde Ortalyq Aziia elderi arasynda katolik qaýymynyń eń kóp ókili Qazaqstanda turady. Hristiandar basqa dindarlarmen birge tózimdilik pen ózara qurmet ústemdik etetin Ádiletti Qazaqstandy qurýǵa zor úles qosyp keledi, – dedi Prezident.
Qasym-Jomart Toqaev Álemdik jáne dástúrli dinder kóshbasshylarynyń sezderin ótkizý Qazaqstannyń álemdegi kelisim men dialogty qamtamasyz etýge baǵyttalǵan kúsh-jigeriniń bir kórinisi ekenine nazar aýdardy.
– Sezd alǵash ret 2003 jyly shaqyrylǵan ýaqyttan beri adamdardyń áralýandyǵyna qaramastan, olardy jaqyndastyrýdyń jaqsy úlgisine ainaldy. Tek dialog, adamdardyń baýyrmaldyǵy men syilastyǵy ǵana birge beibit ómir súrýge jáne toleranttyqqa jol ashatynyna kámil senemin. Osy rette men Qasietti Taqtyń Sezd jumysyna ólsheýsiz úles qosyp, keń qoldaý kórsetkenin joǵary baǵalaimyn, – dedi Memleket basshysy.
Prezident sózin qorytyndylai kele, Sezge katolik shirkeýi basshysynyń qatysýy sharanyń tabysty ótýine yqpal etip, búkil álemdegi katolikterdiń júregine qýanysh pen shattyq uialatatynyna senim bildirdi.
Budan keiin Rim Papasy Frantsisk jiynǵa qatysýshylar aldynda sóz sóiledi. Ol ejelgi qazaq jerine jasaǵan apostoldyq saparyna kóńili tolatynyn jetkizdi. Pontifiktiń aitýynsha, ol munda dialog pen birlik izdeý maqsatymen beibitshiliktiń elshisi retinde kelgen.
– Sizderde «bereke basy – birlikte» degen mátel bar. Bul barlyq jerde, ásirese osy jerde mańyzdy uǵym ekeni sózsiz. Elde 150-ge jýyq etnikalyq top pen seksennen astam til bar. Ártúrli tarihy, mádeni jáne dini dástúrleri bar bul halyqtar birlese, adam aitsa nanǵysyz yntymaqtastyq ornatqan. Sondai-aq Qazaqstandy kópultty, mýltimádenietti, kópkonfessiialy biregei mekenge ainaldyrdy jáne bul memlekettiń Kezdesýler eli degen erekshe atyna sai keledi, – dedi Pontifik.
Katolik shirkeýiniń basshysy Qasym-Jomart Toqaevtyń Qazaqstanda ólim jazasyn alyp tastaý jónindegi sheshimin qoldady. Onyń pikirinshe, bul árbir tulǵanyń úmit etýge quqyǵy jolyndaǵy adam ómiriniń qundylyǵyn rastaidy.
Rim Papasy qazirgi geosaiasi shielenis jaǵdaiynda asa qajet dialogqa qoldaý kórsetý úshin diplomatiialyq kúsh-jigerdi jandandyrýǵa shaqyrdy.
– Arazdyqty shielenistirmeýdi úirenetin, bloktardyń bir-birine qarsylyǵyn kúsheitýdi toqtatatyn ýaqyt jetti. Bizge halyqaralyq deńgeide halyqtar arasyndaǵy ózara túsinistik pen dialogqa yqpal ete alatyn jáne «Helsinki rýhyn» qaita jandandyratyn, mýltilateralizmdi nyǵaitýǵa umtylatyn, óskeleń urpaq úshin turaqty ári beibit álem quratyn kóshbasshylar kerek. Bul úshin bárimen túsinistik, tózimdilik jáne dialog qajet. Qaitalap aitamyn, bárimen! – dedi Rim Papasy Frantsisk.
Pontifik qarýsyzdaný, iadrolyq qarýdy taratpaý, ekonomikany kómirteginen aryltý jáne energiianyń balamaly kózderine investitsiia quiý jónindegi Qazaqstannyń kúsh-jigerin joǵary baǵalady.
– Dinaralyq dialog ornatý isimen qatar munyń bári - adamzattyń ortaq bolashaǵy úshin egilgen úmit dáni. Qasietti Taq osy jolda sizderdi qoldaidy, – dedi Rim Papasy.
Katolik shirkeýiniń basshysy sóziniń sońynda Qasym-Jomart Toqaevqa kórsetken qonaqjailyǵy úshin rizashylyǵyn bildirip, elimizge beibitshilik pen birlik tiledi.
Jiyn sońynda Qazaqstan Prezidenti Pontifikke jyly lebizi men elimizge degen qurmeti, sondai-aq mazmundy sózi úshin alǵys aitty.
