Rim Papasy Frantsisktiń Qazaqstanǵa sapary kezinde qandai is-sharalarǵa qatystany belgili boldy, - dep habarlaidy "Ult aqparat" Syrtqy ister ministrliginiń baspasóz qyzmetine silteme jasap.
Rim Papasy Frantsisk 13-15 qyrkúiek aralyǵynda Qazaqstanǵa memlekettik saparmen keledi.
Birinshi kún baǵdarlamasynda onyń Qazaqstan Prezidenti Qasym-Jomart Toqaevpen, sondai-aq elimizde tirkelgen sheteldik diplomatiialyq korpýs jáne azamattyq qoǵam ókilderimen kezdesýleri qarastyrylǵan.
Rim-katolik shirkeýiniń basshysy saparynyń ekinshi kúninde Álemdik jáne dástúrli dinder liderleriniń VII seziniń ashylýyna jáne plenarlyq otyrysyna, sondai-aq keibir din liderlerimen birqatar kezdesýge qatysady dep kútileli.
"Sonymen qatar 14 qyrkúiekte Rim Papasy Frantsisk myńdaǵan katolik dinin ustanýshylar, onyń ishinde Qazaqstan astanasyna arnaiy keletinderi úshin duǵa (messa) ótkizedi.
Sapardyń sońǵy kúninde ol Álemdik jáne dástúrli dinder liderleriniń VII seziniń jabylýyna jáne onyń qorytyndy deklaratsiiasynyń qabyldanýyna qatysýdy, sondai-aq Rim-katolik shirkeýiniń Qazaqstandaǵy jáne kórshi elderden keletin din qyzmetkerlerimen, monahtarymen jáne seminaristerimen kezdesýdi josparlap otyr" delingen habarlamada.
Esterińizge sala keteiik, Rim-katolik shirkeýi basshysynyń, atap aitqanda Papa Ioann Pavel II-niń Qazaqstanǵa tuńǵysh sapary 2001 jylǵy 22-25 qyrkúiek aralyǵynda ótken. Al Papa Frantsisk - Qazaqstan astanasynda úsh jyl saiyn dástúrli túrde ótetin Álemdik jáne dástúrli dinder liderleriniń sezine qatysýyn rastaǵan Rim-katolik shirkeýiniń birinshi basshysy.
