Juma kúni Rim Papasy Frantsisktiń Irakqa alǵashqy sapary bastaldy. Bul - sondai-aq pontifiktiń pandemiia bastalǵaly birinshi halyqaralyq sapary. Bul týraly The Guardian habarlady.
5 naýryz kúni Rim-katolik shirkeýi basshysynyń ushaǵy Baǵdad áýejaiyna qondy. Ony Iraktyń premer-ministri Mýstafa Kazym men ulttyq kiim kigen jergilikti halyq qarsy aldy.
Málim etilgendei, pandemiiaǵa jáne qaýipsizdik máselelerine bailanysty bul 84 jastaǵy Papa úshin táýekeli eń joǵary sapar bolyp otyr. Osyǵan qaramastan, pontifik sapar shegýge tabandylyq bildirip, «mindettemelermen bailanǵanyn» atap ótken. Sondai-aq ol 1999 jyly Iraktyń sol kezdegi prezidenti Saddam Hýseinniń úkimetimen kelissózder júzege aspai qalýynan Papa II Ioann Paveldiń sapary toqtatylǵanyn meńzei otyryp, irak hristiandaryn ekinshi ret qapy qaldyra almaitynyn aitqan.
Baǵdad pen áýejai arasyndaǵy jol boiynda júzdegen adam jinaldy. Pontifik áýejaidan dástúrli túrde «papamobilmen» emes, oq ótpeitin avtokólikpen shyqqan. Oǵan ondaǵan kólik korteji ilesip júrdi. Irak astanasynyń áýejaiyna taiaýda shabýyl jasalǵandyqtan, el úkimeti joǵary qaýipsizdik sharalaryn qolǵa alǵan.
Prezident saraiynda Papa Frantsiskti Irak prezidenti Barham Salih qarsy aldy. Katolik shirkeýiniń basshysy óziniń alǵysózinde Irakqa kelgenine qýanyshty ekenin jáne eldi órkeniet besigi dep atady. Sondai-aq zorlyq-zombylyq pen ekstremizm aktilerine toqtaý bolatynyna úmit bildirdi.
Óziniń sapary aldynda Papa Frantsisk Irak halqyna videoúndeý joldaǵan bolatyn. Onda bul elge «kóptegen jyldar boiǵy soǵys pen terrorizmnen keiin, Qudaidan keshirim men tatýlyq suraý úshin dindár retinde, táýbesine kelgen dindár retinde bara jatqanyn» aitqan edi.
Túrli statistika boiynsha, búginde Irakta 250 myńǵa jýyq hristian turady. Olardyń shamamen úshten ekisi haldei katolikteri bolyp tabylady. Shirkeýleri ózderiniń derbes litýrgiiasy men dástúrin saqtap keledi. Degenmen, Rim Papasynyń biligin moiyndaýda.
Habarlanǵandai, Papa Frantsiks pen oǵan ilesip júrgen delegatsiia sapar aldynda koronavirýsqa qarsy Pfizer/BioNTech vaktsinasyn saldyrǵan.
Rim-katolik shirkeýiniń basshysy elge sapary barysynda irak sheiitteriniń basshysy aiatolla Áli ál-Sistanimen kezdesýge, kóne Ýr qalasynda ótetin dinaralyq sharaǵa qatysady. Jeksenbi kúni pontifik Mosýlǵa barady. Onda terrorizm qurbandary úshin duǵa oqidy. Odan keiin Qarkoshke jol tartyp, Erbile stadionynda litýrgiia ótkizedi.
