Foto: instagram.com/danial.akhmetov.official
Shyǵys Qazaqstan oblysynyń ákimi Danial Ahmetov Ridder jylý elektr ortalyǵyndaǵy aqaýlar men apattardan úileri qaita-qaita sýyp ketip otyrǵan turǵyndardan keshirim surady, dep habarlaidy QazAqparat.
ShQO ákimdiginiń málimetinshe, aimaq basshysy Danial Ahmetov Ridder qalasyna baryp, jylý elektr ortalyǵyndaǵy ahýalmen tanysty.
«Ortalyq basshylyǵynyń jaýapsyzdyǵynan osyndai oqiǵalar bolyp jatyr. Olar 4 jyl boiy eshteńe istemegen. Memlekettik organdardy jalǵan anyqtamalarmen aldap keldi. Byltyr qarasha aiynda alǵash ret apat bolǵan kezde biz basqa kásiporyndar men jylý elektr ortalyqtarynan 160 mamandy tartyp, qalpyna keltirý jumysyn qolǵa aldyq. Óte múshkil halde bolǵan joǵary qysymdy 2 qazandyqty qysqa ýaqyt úshinde jóndep shyǵardyq», - deidi oblys ákimi.
Foto: inform.kz
Onyń aitýynsha, JEO ieleri bul qazandyqtardy jóndeýdi múlde oilamaǵan. Tipti olar kómir aqysyn tóleýden de bas tartqan. Soǵan qaramastan Qarajyra ken orny ákimdik kepildigimen kómir jetkizýdi toqtatpady. Qazir ortalyqtyń kómir úshin qaryzy 1 mlrd 350 mln teńgeni quraǵan.
Foto: inform.kz
«Jylý temperatýrasy tómendep ketkeni úshin Ridder halqynan keshirim suraimyn. Bul turǵyndar úshin tikelei mańyzdy osyndai nysan ieleriniń olqylyqtaryna jol berip otyrǵan zańdaǵy kemshilikterden týyndady deýge de bolady. Prezidenttiń tapsyrmasymen quzyrly ministrlik tarapynan zańǵa ózgerister engizilip, bizge JEO jumystaryn talapqa sáikes baqylaýǵa múmkindik bolady dep senemin», - dedi Danial Ahmetov.
Eske salsaq, keshe Ridderdegi jylý elektr ortalyǵynan órt shyqqan bolatyn. Qyzyl jalyn birneshe saǵatta aýyzdyqtaldy. Otqa oranǵan kómir tsehy úsh kúnde qalpyna keltiriletindigi habarlandy. Qazir jylý elektr ortalyǵynyń basshylyǵyna qatysty tergeý júrgizilip jatyr.
