BUU-daǵy AQSh ýákiliniń mindetin atqarýshy Bas assambleianyń Ýkraina shyǵysy men Máskeý anneksiialaǵan Qyrymdaǵy jaǵdai boiynsha talqylaýynda sóz sóiledi. Richard Mills uiym múshelerin adam quqyǵyn buzý men Qyrymdy militarizatsiia máselesine nazar aýdaratyn rezoliýtsiiaǵa daýys berýge shaqyrdy.
"Amerika daýysy" saitynyń jazýynsha, Mills AQSh áriptesterimen birge Ýkrainanyń egemendigi men territoriialyq tutastyǵyn budan ári de qoldai beredi jáne Qyrymdy jaýlap alǵan Reseidiń áreketin eshqashan moiyndamaidy dep shegelep aitqan.
"Ýkraina aýmaǵynda ásker, tankiler men qarý-jaraqtarmen turǵan Resei qaqtyǵysty sheshý máselesinde ózin araaǵaiyndyq jasaýshy retinde kórsetkisi keledi, shyn máninde ol - qaqtyǵysty órshitýshi" dedi Mills. Onyń sózine qaraǵanda, Reseidiń Qyrymdy militarizatsiialaýyn kúsheitýi - alańdatarlyq jaǵdai.
Mills Reseidi 100 ýkrain saiasi tutqynyn bosatýǵa shaqyryp, Qyrym tatarlary men Iegovo kýáleri jáne ózge de okkýpatsiiaǵa qarsy shyqqandardy qýdalaýyn doǵarýǵa úndedi.
"Resei Ýkraina shyǵysynda agressiialyq áreketin doǵaryp, Qyrym anneksiiasyn toqtatýy kerek. Biz muny talap etemiz ári suraimyz. Ýkrainanyń beibitshilikke umtylysy aiqyn. AQSh ýkrainalyq "Qyrym platformasy"bastamasyn jyly qabyldaidy jáne Resei agressiiasyna tótep berý úshin uiymǵa múshe (BUU) ózge de memleketter osy diplomatiialyq talpynysqa qosylý múmkindigin qarastyrady dep úmittenedi" dedi Mills.
