1945 jyldyń 30 sáýirinde Reihstag ǵimaratyna shabýyl bastaldy. Onyń qasbetine alǵashqy Qyzyl týdy 150-shi atqyshtar diviziiasynyń 674-shi atqyshtar polkiniń jaýyngerleri Raqymjan Qoshqarbaev pen Grigorii Býlatov ornatty, dep habarlaidy "Ult aqparat" Resei Federatsiiasy Syrtqy ister ministrliginiń Instagram jelisindegi paraqshasyna silteme jasap.
Berlinniń qaq ortasynda ornalasqan Reihstag gitlerlik Germaniianyń basty simvoldarynyń biri edi. Jaý ony qorǵaýǵa jan-jaqty daiyndaldy. Ǵimaratty qorǵaýǵa tańdaýly armiia bólimsheleri jiberildi.
«Reihstagtyń baspaldaqtarymen kóterilgen alǵashqylardyń arasynda 20 jastaǵy leitenant Raqymjan Qoshqarbaev pen 19 jasar qyzyl áskerlik Grigorii Býlatov boldy. Jaýyngerler qoldaryna alqyzyl matadan jasalǵan týtuǵyr ustaǵan edi. 150-shi diviziianyń soǵys jýrnalyna sáikes, saǵat 14:25-te olar «jer baýyrlap, ǵimarattyń ortalyq jetip, basty kireberistiń baspaldaǵyna qyzyl týdy tikken». Bul Reihstagqa azat etýshi jaýyngerler tikken týlardyń alǵashqysy boldy.
Reihstagtyń baspaldaqtarynda jelbiregen Qyzyl Tý bizdiń jaýyngerlerge kúsh berdi. 30 sáýir kúni keshke 674 jáne 756-polkterdiń negizgi kúshteri fashisterdiń shebin buzyp ótip, ǵimaratqa kirdi. Túnde leitenant Berest, serjant Kantariia jáne qyzyl áskerlik Egorov nemis mergenderiniń atqylaǵan oǵyna qaramai, fashizm ordasynyń ústine Jeńis týyn ornatty. Reihstagtyń jertóleleri men dálizderindegi qyzý shaiqas 2 mamyrǵa deiin jalǵasty» delingen RF SIM maqalasynda.
Reihstagty alý kezinde kórsetken erligi men batyrlyǵy úshin Raqymjan Qoshqarbaev pen Grigorii Býlatov Qyzyl Tý ordenimen marapattaldy. Qoshqarbaevqa arnalǵan eskertkishter onyń Otany – Qazaqstannyń Aqmola oblysy men respýblikanyń astanasy Nur-Sultan qalasynda, al Býlatovqa Kirov qalasynda ornatyldy.
