Sońǵy kúnderi rezidentýraǵa qabyldaýdyń jańa júiesine qatysty kóptegen suraq týyndaýda. Biz jas dárigerlerdiń alańdaýshylyǵyn túsinemiz jáne eń ózekti máselelerge túsinikteme bergimiz keledi: Densaýlyq saqtaý ministrligi rezidentýraǵa úmitkerlerdi irikteýdiń jańa tsifrlyq júiesin ne úshin engizdi jáne ol qandai mindetterdi sheshedi?
Rezidentýraǵa qabyldaý qaǵidalary nege ózgerdi?
Bizdiń basty mindetimiz – konkýrsty barynsha ádil, ashyq ári obektivti ótkizý. Rezidentýraǵa qabyldaý alǵash ret biryńǵai elektrondyq platforma arqyly tolyq júzege asyrylýda. Sheshimdi adam emes, kandidattardy avtomattandyrylǵan túrde reitingteý júiesi qabyldaidy. Bul adami faktordyń yqpalyn boldyrmaidy, barlyq túlekterge teń jaǵdai jasaidy jáne bilim berý granttaryn bólýdi barynsha ashyq etedi.
Konkýrstyq ball qalai qalyptastyrylady?
Kandidattardy baǵalaý kezinde eki obektivti kórsetkish teń úleste eskeriledi:
- GPA – oqýdyń barlyq kezeńindegi akademiialyq úlgerim;
- táýelsiz qorytyndy attestattaý (TQA) nátijesi.
Mundai tásil bir ǵana emtihanda kórsetilgen bilim deńgeiin emes, bolashaq dárigerdiń búkil oqý kezeńindegi daiarlyq sapasyn baǵalaýǵa múmkindik beredi.
GPA jekelegen joǵary oqý oryndaryna artyqshylyq beredi degen ras pa?
Joq.
Ministrlik elimizdegi meditsinalyq joǵary oqý oryndarynyń nátijelerine taldaý júrgizdi. Taldaý ýniversitetter arasyndaǵy ortasha GPA kórsetkishteriniń aiyrmashylyǵy aitarlyqtai emes ekenin kórsetti.
Sonymen qatar, táýelsiz qorytyndy attestattaý barlyq túlekter úshin biryńǵai talaptar negizinde ótkiziledi jáne olardyń daiarlyq deńgeiin oqyǵan oqý ornyna qaramastan obektivti salystyrýǵa múmkindik beredi.
GPA men TQA nátijelerin biriktirgennen keiin iri meditsinalyq joǵary oqý oryndarynyń arasyndaǵy ortasha konkýrstyq ball aiyrmashylyǵy shamamen úsh baldy quraidy. Bul keshendi baǵalaý, kerisinshe, ártúrli ýniversitetterdiń ishki baǵalaý júielerindegi erekshelikterdi teńestiretinin dáleldeidi.
Nelikten baǵalaýdy tek bir emtihan nátijesi boiynsha júrgizýge bolmaidy?
Sebebi bilikti dáriger – kóp jyldyq oqý, tájiribe jáne ózin úzdiksiz jetildirýdiń nátijesi.
GPA stýdenttiń búkil oqý kezeńindegi júieli daiarlyǵyn kórsetedi, al táýelsiz qorytyndy attestattaý biryńǵai ulttyq standarttar negizinde onyń bilim deńgeiin rastaidy.
Osy eki kórsetkishtiń úilesimi bolashaq mamannyń kásibi qyzmetke daiarlyǵyn barynsha obektivti baǵalaýǵa múmkindik beredi.
Mundai model basqa elderde qoldanyla ma?
Iá. Frantsiiada rezidentýraǵa bólý de túlekterdi ulttyq qorytyndy baǵalaý nátijeleri negizinde júzege asyrylady.
AQSh pen Kanadada oqýǵa túsý kezinde ulttyq emtihandardyń nátijeleri, akademiialyq úlgerim, oqý kezeńindegi jetistikter jáne basqa da obektivti kórsetkishter eskeriledi. Bul elderde meditsinalyq ýniversitetti bitirgennen keiin jeke qabyldaý emtihany ótkizilmeidi.
Bul – meditsinalyq bilim berý júiesi damyǵan elderde qoldanylatyn halyqaralyq praktika.
Nelikten biyl konkýrs joǵary bolyp kórinedi?
Óitkeni biylǵy qabyldaý naýqanynyń ózindik erekshelikteri bar.
Konkýrsqa bir mezgilde:
- alty jyldyq bilim berý baǵdarlamalarynyń túlekteri;
- jeti jyldyq bilim berý baǵdarlamalarynyń túlekteri;
- ótken jyldardaǵy túlekter qatysýda.
30 shildedegi jaǵdai boiynsha elektrondyq platformada 14 myńnan astam ótinim óńdeldi. Konkýrsqa shamamen 8,9 myń úmitker qatysady dep kútilýde, olardyń 2,6 myńnan astamy – ótken jyldardyń túlekteri.
Memlekettik granttar jetkilikti me?
Memleket mamandar daiarlaýǵa arnalǵan múmkindikterdi jyl saiyn keńeitip keledi.
2024 jyldan bastap rezidentýrada bilim alýǵa jyl saiyn 2 500 memlekettik grant bólinedi.
Budan bólek, jergilikti atqarýshy organdardyń qarajaty esebinen de qarjylandyrý júzege asyrylady, sondai-aq aqyly negizde bilim alý múmkindigi saqtalǵan.
Nátijesinde jyl saiyn shamamen 3 500 jas dáriger memleket qarajaty esebinen rezidentýrada oqýyn jalǵastyrady.
Nelikten memleket belgili bir mamandyqtarǵa basymdyq beredi?
Óitkeni kadrlardy daiarlaý patsientterdiń naqty qajettilikterine sai bolýy tiis.
Búginde elimizde dárigerler tapshylyǵy shamamen 3,9 myń mamandy quraidy. Eń kóp suranys jalpy praktika dárigerlerine, terapevterge, hirýrgterge jáne pediatrlarǵa baiqalady.
Sondyqtan memlekettik bilim berý tapsyrysy, eń aldymen, densaýlyq saqtaý júiesiniń kadrlarǵa degen qajettiligi joǵary baǵyttar boiynsha qalyptastyrylady.
Rezidentýraǵa túse almaǵan túlekter ne istei alady?
Olar meditsinalyq-sanitariialyq alǵashqy kómek uiymdaryna, aýdandyq jáne aýyldyq aýrýhanalarǵa erkin jumysqa ornalasa alady. Búginde bul mekemelerde jas mamandarǵa suranys erekshe joǵary.
Internatýrany aiaqtaǵannan keiin túlek diplomy bar dáriger bolyp tabylady jáne óz betinshe jumys isteýge quqyly ekenin túsiný mańyzdy.
Bul – kásibi mansapty tolyqqandy bastaýdyń jáne praktikalyq tájiribe jinaqtaýdyń múmkindigi.
Júie odan ári jetildirile me?
Árine.
Kez kelgen jańa tsifrlyq júie beiimdelý kezeńin qajet etedi. Biz qabyldaý naýqanynyń barysyn muqiiat taldaimyz, kásibi dialogqa ashyqpyz jáne jekelegen tetikterdi jetildirýge daiynbyz.
Alaida basty qaǵidat ózgerissiz qalady: rezidentýraǵa qabyldaý ádil, ashyq jáne obektivti bolýy tiis, al meditsina kadrlaryn daiarlaý patsientterdiń múddeleri men Qazaqstannyń densaýlyq saqtaý júiesiniń qajettilikterine sai kelýi qajet.
