Foto: QR Qorǵanys ministrligi
Parlament Májilisi "Qazaqstan Respýblikasynyń keibir zańnamalyq aktilerine rezervtegi qyzmet máseleleri boiynsha ózgerister engizý týraly" zań jobasyn birinshi oqylymda maquldady, dep habarlaidy Sputnik Qazaqstan.
Qorǵanys ministri Rýslan Jaqsylyqovtyń aitýynsha, zań memleketimizdiń mobilizatsiialyq daiyndyǵyn jetildirýge baǵyttalǵan.
"Álemde ekonomikasy damyǵan birde bir jetekshi memleket tolyq jinaqty armiiany ustai almaidy. Sebebi bul óte qymbat. Rezervtegi qyzmet týraly zań birneshe elde – Resei, Frantsiia, Italiia, Belarýs jáne taǵy basqa memleketterde bar", - dedi Jaqsylyqov Májilis otyrysynda.
Aitýynsha, Qorǵanys ministrligi rezervtegi qyzmetti 2025 jyly qurýdy josparlap otyr. Bul úshin barlyq áleýmettik-turmystyq, zańnamalyq jáne materialdyq-tehnikalyq qamtamasyz etý máselelerin sheshý qajet.
Alǵashqy kezeńde 2 myńǵa jýyq rezervisti shaqyrý josparlanǵan.
"2000 – bul, eń aldymen, salalyq mamandar. Osy eki myń adamǵa jylyna 3,5 mlrd teńge qajet. Bul soma 2025 jylǵa respýblikalyq biýdjette qoldaý tapty. Júieni jolǵa qoiǵannan keiin biz bul somany ulǵaitamyz. Ony biýdjetke engizemiz", - dedi Qorǵanys ministri.
Jaqsylyqov kelisimshart erikti túrde úsh jylǵa jasalatynyn atap ótti. Daiarlyq bir jylda eki aidan aspaidy. Jiyn 30 kún, sabaq ai saiyn eki-úsh kún bolady.
"Oǵan qarajat respýblikalyq biýdjet esebinen bólinedi. Osy sanattaǵy adamdarǵa ai saiyn eń tómen jalaqy, jiyn kezinde ortasha jalaqy tóleý josparlanýda. Áskeri rezervtegi adam qyzmet etken kezde jumys orny (laýazymy) saqtalady", - dedi Qorǵanys ministri.
Ministrdiń aitýynsha, bul qyzmetti engizý beibit ýaqytta ásker sanyn arttyrmai, qoiylǵan mindetti oryndaýǵa daiyn azamattar sanyn daiarlaýǵa múmkindik beredi.
Zańdy qabyldaý áleýmettik turǵydan tiimdi:
• rezervke qyzmetke kirgen azamattyń kirisi artady, memleket tarapynan kómekke júginý tómendeidi;
• halyqtyń memleketke, Qarýly kúshterge degen senimi artady;
•áskeri rezervtegi adam qazaqstandyq patriotizm rýhynda tárbie alady.
Parlament májilisi zań jobasyn birinshi oqylymda maquldady.
