Foto: Ermurat Bapidiń jeke arhivinen
15 qarashada Májilistiń jalpy otyrysynda «Qazaqstan Respýblikasynyń keibir zańnamalyq aktilerine rezervtegi qyzmet máseleleri boiynsha ózgerister men tolyqtyrýlar engizý týraly» zań jobasy birinshi oqylymda qaralady, dep habarlaidy Kazinform.
Qujatty elimizdiń Qorǵanys ministrligi ázirledi. Byltyr jeltoqsanda Májilis qaraýyna engizilgen osy zań jobasyn depýtattar jumys tobynyń otyrystarynda egjei-tegjeili talqydan ótkizdi. Osy oraida depýtat Ermurat Bapi bul qujattyń negizgi maqsatyna qatysty túsinik berdi.
«Jaman aitpai, jaqsy joq, eger de elimizge áldebir qater tóngen jaǵdaida, burynǵydai mobilizatsiiaǵa shaqyryp, odan keiin áskerge shaqyrylǵan azamattyń kiim-keshegin berip, olardy daiyndyqtan ótkizý, qarý-jaraqpen qamtamasyz etý qadamdary - tym uzaq protsess. Al rezervtegi áskerler - bul áskerdiń jańa túri. Olar belgilegen merzimde jaýyngerlik daiyndyqtan ótip turady. Turaqty túrde tiisti oqý-jattyǵý jiyndary uiymdastyrylady. Osynyń nátijesinde daiyndyqtan ótkenderdi ýákiletti organ tiisti áskeri bólimshelerge birden baǵyttaidy», - dedi Bapi.
Atap aitqanda, rezervtegi qyzmetke tartylǵandar urysqa daiyn quram retinde jasaqtalady. Bul rezervtegi qyzmet qysqa merzimde tiisti áskeri bólimge kelýge, sondai-aq qoiylǵan mindetterdi oryndaýǵa dereý kirisýge daiarlanǵan azamattardyń saqadai-sai turýyna septigin tigizedi.
«Osy zań jobasyn ázirleýdiń negizgi maqsatyna toqtalsaq, qazirgi álemdegi geosaiasi jaǵdai kezinde elimizdiń qorǵanys qabiletin nyǵaitýǵa baǵyttalǵan. Bul turǵyda rezervtegi azamattar arqyly ásker qataryn jyldam toltyrý qarastyrylǵan. Olar aldyn ala daiyndyqtan ótedi. Rezervtegilerdi jumyldyrý qajet bolsa, daiyndyqtan ótkender birinshi dabyldan keiin óziniń áskeri bólimine kelip, ózi jaýapty áskeri beketke barady nemese áskeri tehnikasyna otyrady», - dedi depýtat.
Rezervtegi qyzmetke tartylǵandarmen erikti túrde kelisimshart jasalady. Sonymen qatar, zań jobasynda rezervte turǵan adam men jumys berýshi arasynda qatynastardy retteý tetikteri bar.
«Rezervke barýǵa ár adam erikti túrde tańdaý jasaidy. Ásirese, jumyssyz júrgenderdi áskerge tartý pysyqtaldy. Bul rette tiisti jalaqy tólenedi. Máselen, ai saiyn birneshe sabaqqa qatysqandarǵa minimaldy jalaqy, al oqý-jattyǵý jiyndary kezinde ortasha ailyq jalaqy beriledi», - dedi Ermurat Seitqazyuly.
Tótenshe nemese soǵys jaǵdaiynda jalaqy máselesi tiisti zańdar aiasynda retteletin bolady.
Depýtattyń sózine qaraǵanda, bul zań jobasyn ázirleý kezinde álemdegi birqatar qaqtyǵys aimaǵynda jinaqtalǵan tájiribe zertteldi. Zań jobasyn Qorǵanys ministrligi daiarlap, bul vedomstvo biraz derekti zerdelegen.
«Atap aitqanda, osy aptada Májiliste qaralatyn «Qazaqstan Respýblikasynyń keibir zańnamalyq aktilerine rezervtegi qyzmet máseleleri boiynsha ózgerister men tolyqtyrýlar engizý týraly» zańy jyl sońyna deiin qabyldanýy kerek. Sebebi bul qujattyń tájiribe júzinde iske asyrylýy keler jyldan bastap qolǵa alynady. Rezervtegi alǵashqy áskeri quramalar 2025 jyldan quryla bastaidy. Jalpy, qazirgi teńselip turǵan geosaiasi jaǵdaidy eskere otyryp, arqany keńge salyp júrýge bolmaidy. Bul zań qabyldanǵannan keiin, Qorǵanys ministrligi shuǵyl jumystarǵa kirisedi», - dedi Ermurat Bapi.
Munymen qosa, osy qujat aiasynda rezervtegi qyzmetke jumyldyrylǵandardyń jaýapkershiligi men mindeti, tártibi jan-jaqty belgilenedi.
Zań qabyldanǵan jaǵdaida, qorǵanys salasyna bólinetin biýdjet qarajaty birshama ósýi múmkin.
