فوتو: ەرمۇرات باپيدٸڭ جەكە ارحيۆٸنەن
15 قاراشادا مەجٸلٸستٸڭ جالپى وتىرىسىندا «قازاقستان رەسپۋبليكاسىنىڭ كەيبٸر زاڭنامالىق اكتٸلەرٸنە رەزەرۆتەگٸ قىزمەت مەسەلەلەرٸ بويىنشا ٶزگەرٸستەر مەن تولىقتىرۋلار ەنگٸزۋ تۋرالى» زاڭ جوباسى بٸرٸنشٸ وقىلىمدا قارالادى, دەپ حابارلايدى Kazinform.
قۇجاتتى ەلٸمٸزدٸڭ قورعانىس مينيسترلٸگٸ ەزٸرلەدٸ. بىلتىر جەلتوقساندا مەجٸلٸس قاراۋىنا ەنگٸزٸلگەن وسى زاڭ جوباسىن دەپۋتاتتار جۇمىس توبىنىڭ وتىرىستارىندا ەگجەي-تەگجەيلٸ تالقىدان ٶتكٸزدٸ. وسى ورايدا دەپۋتات ەرمۇرات باپي بۇل قۇجاتتىڭ نەگٸزگٸ ماقساتىنا قاتىستى تٷسٸنٸك بەردٸ.
«جامان ايتپاي, جاقسى جوق, ەگەر دە ەلٸمٸزگە ەلدەبٸر قاتەر تٶنگەن جاعدايدا, بۇرىنعىداي موبيليزاتسيياعا شاقىرىپ, ودان كەيٸن ەسكەرگە شاقىرىلعان ازاماتتىڭ كيٸم-كەشەگٸن بەرٸپ, ولاردى دايىندىقتان ٶتكٸزۋ, قارۋ-جاراقپەن قامتاماسىز ەتۋ قادامدارى - تىم ۇزاق پروتسەسس. ال رەزەرۆتەگٸ ەسكەرلەر - بۇل ەسكەردٸڭ جاڭا تٷرٸ. ولار بەلگٸلەگەن مەرزٸمدە جاۋىنگەرلٸك دايىندىقتان ٶتٸپ تۇرادى. تۇراقتى تٷردە تيٸستٸ وقۋ-جاتتىعۋ جيىندارى ۇيىمداستىرىلادى. وسىنىڭ نەتيجەسٸندە دايىندىقتان ٶتكەندەردٸ ۋەكٸلەتتٸ ورگان تيٸستٸ ەسكەري بٶلٸمشەلەرگە بٸردەن باعىتتايدى», - دەدٸ باپي.
اتاپ ايتقاندا, رەزەرۆتەگٸ قىزمەتكە تارتىلعاندار ۇرىسقا دايىن قۇرام رەتٸندە جاساقتالادى. بۇل رەزەرۆتەگٸ قىزمەت قىسقا مەرزٸمدە تيٸستٸ ەسكەري بٶلٸمگە كەلۋگە, سونداي-اق قويىلعان مٸندەتتەردٸ ورىنداۋعا دەرەۋ كٸرٸسۋگە دايارلانعان ازاماتتاردىڭ ساقاداي-ساي تۇرۋىنا سەپتٸگٸن تيگٸزەدٸ.
«وسى زاڭ جوباسىن ەزٸرلەۋدٸڭ نەگٸزگٸ ماقساتىنا توقتالساق, قازٸرگٸ ەلەمدەگٸ گەوساياسي جاعداي كەزٸندە ەلٸمٸزدٸڭ قورعانىس قابٸلەتٸن نىعايتۋعا باعىتتالعان. بۇل تۇرعىدا رەزەرۆتەگٸ ازاماتتار ارقىلى ەسكەر قاتارىن جىلدام تولتىرۋ قاراستىرىلعان. ولار الدىن الا دايىندىقتان ٶتەدٸ. رەزەرۆتەگٸلەردٸ جۇمىلدىرۋ قاجەت بولسا, دايىندىقتان ٶتكەندەر بٸرٸنشٸ دابىلدان كەيٸن ٶزٸنٸڭ ەسكەري بٶلٸمٸنە كەلٸپ, ٶزٸ جاۋاپتى ەسكەري بەكەتكە بارادى نەمەسە ەسكەري تەحنيكاسىنا وتىرادى», - دەدٸ دەپۋتات.
رەزەرۆتەگٸ قىزمەتكە تارتىلعاندارمەن ەرٸكتٸ تٷردە كەلٸسٸمشارت جاسالادى. سونىمەن قاتار, زاڭ جوباسىندا رەزەرۆتە تۇرعان ادام مەن جۇمىس بەرۋشٸ اراسىندا قاتىناستاردى رەتتەۋ تەتٸكتەرٸ بار.
«رەزەرۆكە بارۋعا ەر ادام ەرٸكتٸ تٷردە تاڭداۋ جاسايدى. ەسٸرەسە, جۇمىسسىز جٷرگەندەردٸ ەسكەرگە تارتۋ پىسىقتالدى. بۇل رەتتە تيٸستٸ جالاقى تٶلەنەدٸ. مەسەلەن, اي سايىن بٸرنەشە ساباققا قاتىسقاندارعا مينيمالدى جالاقى, ال وقۋ-جاتتىعۋ جيىندارى كەزٸندە ورتاشا ايلىق جالاقى بەرٸلەدٸ», - دەدٸ ەرمۇرات سەيتقازىۇلى.
تٶتەنشە نەمەسە سوعىس جاعدايىندا جالاقى مەسەلەسٸ تيٸستٸ زاڭدار اياسىندا رەتتەلەتٸن بولادى.
دەپۋتاتتىڭ سٶزٸنە قاراعاندا, بۇل زاڭ جوباسىن ەزٸرلەۋ كەزٸندە ەلەمدەگٸ بٸرقاتار قاقتىعىس ايماعىندا جيناقتالعان تەجٸريبە زەرتتەلدٸ. زاڭ جوباسىن قورعانىس مينيسترلٸگٸ دايارلاپ, بۇل ۆەدومستۆو بٸراز دەرەكتٸ زەردەلەگەن.
«اتاپ ايتقاندا, وسى اپتادا مەجٸلٸستە قارالاتىن «قازاقستان رەسپۋبليكاسىنىڭ كەيبٸر زاڭنامالىق اكتٸلەرٸنە رەزەرۆتەگٸ قىزمەت مەسەلەلەرٸ بويىنشا ٶزگەرٸستەر مەن تولىقتىرۋلار ەنگٸزۋ تۋرالى» زاڭى جىل سوڭىنا دەيٸن قابىلدانۋى كەرەك. سەبەبٸ بۇل قۇجاتتىڭ تەجٸريبە جٷزٸندە ٸسكە اسىرىلۋى كەلەر جىلدان باستاپ قولعا الىنادى. رەزەرۆتەگٸ العاشقى ەسكەري قۇرامالار 2025 جىلدان قۇرىلا باستايدى. جالپى, قازٸرگٸ تەڭسەلٸپ تۇرعان گەوساياسي جاعدايدى ەسكەرە وتىرىپ, ارقانى كەڭگە سالىپ جٷرۋگە بولمايدى. بۇل زاڭ قابىلدانعاننان كەيٸن, قورعانىس مينيسترلٸگٸ شۇعىل جۇمىستارعا كٸرٸسەدٸ», - دەدٸ ەرمۇرات باپي.
مۇنىمەن قوسا, وسى قۇجات اياسىندا رەزەرۆتەگٸ قىزمەتكە جۇمىلدىرىلعانداردىڭ جاۋاپكەرشٸلٸگٸ مەن مٸندەتٸ, تەرتٸبٸ جان-جاقتى بەلگٸلەنەدٸ.
زاڭ قابىلدانعان جاعدايدا, قورعانىس سالاسىنا بٶلٸنەتٸن بيۋدجەت قاراجاتى بٸرشاما ٶسۋٸ مٷمكٸن.
