Prezidenttik kadr rezervine engenderdiń boiynan uly Abaidyń «Tolyq adam» sipattamasynyń belgilerin kórýge bolady. Mundai pikirdi jastar rezervinen kóringen Álibek Ydyrys bildirdi, - dep habarlaidy QazAqparat.
«Prezidenttik jastar kadr rezervine enýge arnalǵan baiqaý 6 kezeńnen turdy. Negizinde, baiqaýǵa daiyndalýdyń qajeti bolmady. Sebebi, kriteriiler qatysýshylardyń boiynda burynnan qalyptasqan quzirettilikterine jáne jinaǵan tájirbielerine negizdelgen. Bul negizdeme - basshylyq qyzmettegi adamnyń riiasyz tulǵasy jáne halyqpen etene jumys jasaý, iaǵni halyq únine qulaq asatyn, sonymen birge áleýmettik-ekonomikalyq máselelerdi sheshý qabiletine sai jasalǵan. Sondyqtan, rezervshilerdiń boiynan uly Abai atamyzdyń «Tolyq adam» sipattamasynyń belgilerin kórýge bolady», - dedi Álibek Ydyrys.
Onyń aitýynsha, Prezidenttik kadr rezervi boiynsha qyzmetke ornalasýǵa kóptegen usynystar túsken jáne áli de túsip jatyr. Degenmen, jas rezervshi ál-Farabi atyndaǵy QazUÝ rektory Ǵalymqaiyr Mutanulynyń jeke qabyldaýynda bolyp, onyń ýniversitet janynan qurylǵan Biomeditsina ǵylymi zertteý ortalyǵynyń bashysy bolý turaly usynysyn qabyl alǵan.
«Bul qyzmet meniń osy konkýrsqa túsýdegi maqsatymnan basqasha bolǵanymen, tájiribe jinaý úshin jáne bul sala boiynsha elimizde tuńǵysh ret ashylyp otyrǵan ortalyqtyqtyń aiaqtan turyp ketýi úshin túsken usynysty qabyl aldym. Jastarǵa oqý-praktikalyq, ǵylymi-zertteý ortalyqtyń ashylýy kezek kúttirmeitin másele edi. Alda bizdiń ortalyq hronomeditsina, biomassaj, akýpýntýra, fitopreparattar, endokrinologiia, immýnologiia, profilaktika, meditsinalyq biofizika, PTsR analiz jáne taǵy basqa baǵyttar boiynsha jumys jasaidy. Bolashaqta osy ortalyqty institýt, odan ary respýblikalyq ulttyq zertteý ortalyǵyna ainaldyrsaq degen josparymyz bar», - dedi jas rezervshi.
«Biz sekildi jastarǵa Memleket basshysy Qasym-Jomart Toqaev óziniń kemeńgerligimen «Prezidenttik jastar kadr rezervi» atty joba usynyp, elge qyzmet etip, Qazaqstandy damytýǵa úles qosýǵa múmkindik berip otyr. Negizinde, aýyl sharýashylyǵy salasy boiynsha «Qazaqstannyń bolashaq fermerleri» dep atalatyn jobamdy qorǵap, elimizde aýyl sharýashylyǵyn damytý boiynsha óz ideiamdy usynǵan edim. Ekinshiden, áli de bolsa elmizdiń soltústik oblystaryn qazaqylandyrý jáne damytý boiynsha jumys jasap, sol óńirlerge basshylyq qyzmetke barý oiymda bar. Endi bes jyldan keiin ózimdi halyq jáne Prezident senip tapsyrǵan mindetti adaldyqpen oryndap, saiasyn jaia bastaǵan báiterek retinde kóremin», - dedi Álibek Ydyrys.
Aita keteiik, Álibek Ydyrys ál-Farabi atyndaǵy Qazaq ulttyq ýniversiteti biologiia jáne biotehnologiia fakýlteti, b iofizika jáne biomeditsina kafedrasy meńgerýshisiniń ǵylymi qyzmet jáne halyqaralyq bailanystar jónindegi orynbasary qyzmetin atqarǵan. Atalǵan joǵary oqý ornynyń aǵa oqytýshysy.
Eske sala ketsek, osydan birneshe kún buryn Aqordada Memleket basshysy Qasym-Jomart Toqaev Prezidenttik kadr rezervine engen 300 jaspen kezdesý ótkizgen bolatyn. Jiynda Qasym-Jomart Toqaev el jastaryna úndeý joldady.
