Búgin, iaǵni 11 qazanda Sh.Shaiahmetov atyndaǵy «TIL-QAZYNA» ulttyq ǵylymi-praktikalyq ortalyǵynyń uiymdastyrýymen «Qala, aýdan jáne oblys mekeme ataýlaryn latyn álipbiinde tańbalaý» atty respýblikalyq onlain seminary ótti.
Onlain seminarda orfografiialyq top músheleri tarapynan ázirlengen «Qala, oblys, aýdan mekeme ataýlarynyń anyqtamalyǵy» talqyǵa salyndy. Sarapshy mamandar tarapynan birqatar usynys-pikirler aitylyp, avtorlarǵa joldandy. Sarapshylar tarapynan birqatar máseleler kóterilip, seminarǵa qatysýshylar talqysyna salyndy.
Filologiia doktory (PhD) Ásem Qasymova Qazaqstannyń barlyq óńirinde ergonimderdiń jazylýynda birizdiliktiń bolmaityndyǵyn, kóbinese ataýlardyń orys tilinde berilip, qazaqshaǵa qate aýdarylatyndyǵyn, bir ǵana mekeme, uiym ataýlarynyń qazaqsha nusqasy ártúrli beriletindigin, grammatikalyq turǵydan qate jazylýy jii kezdesetindigin atap ótip, mundai olqylyqtardy retke keltirýde Anyqtamalyqtyń asa qajet ekendigin atap ótti.
«Almatykitap» baspasynyń bas redaktory Ómirzaq Ábdishúkiruly Qazaqstan ataýy halyqaralyq arenada áli de sovettik nusqamen jazylyp jatqandyǵyn, halyqaralyq Kazakhstan jáne qazirgi qoldanystaǵy Qazaqstan ataýlarynyń qoldanylýyn retteý kerektigin aitty.
Qaraǵandy oblysynyń tilderdi damytý jónindegi basqarmasy janyndaǵy Resýrstyq til ortalyǵy meńgerýshisi Jupar Jaqanova qazirgi tildik keńistiktegi ergonimderdiń saýatty jazylýyn latynnegizdi grafikaǵa kósher tusta rettep alýdyń asa mańyzdylyǵyn jáne bul másele tektilshi ǵalymdardy ǵana tolǵandyryp qoimai, tutas qoǵam nazarynda bolatyn másele ekendigin atap ótti.
E.A.Bóketov atyndaǵy Qaraǵandy memleketik ýniversitetiniń dotsenti Sveta Samenova jekemenshik kommýnaldyq uiymdar ataýlaryn arnaiy daiyndyǵy joq kóptegen jarnamalyq agenttikterdiń qyzmetkerleri qoiatynyn, ergonimderdi teoriialyq bazaǵa súiene otyryp birizdendirý kerektigin tilge tiek etti.
Onlain seminarǵa Aqmola oblystyq oqý-ádistemelik ortalyǵynyń, ShQO Tilderdi damytý jáne úilestirý jumysy bóliminiń, Qostanai oblysy ákimdiginiń tilderdi damytý basqarmasynyń, Shymkent qalalyq tilderdi oqytý-ádistemelik ortalyǵynyń, Qyzylorda oblystyq ishki saiasat basqarmasy bóliminiń, Jambyl oblysy Tilderdi oqytý ortalyǵynyń basshylary men mamandary qatysty.
