Qazaqstanda 2021 jyldan bastap respýblikalyq mańyzy bar jol boiynda ájethanasy bar jańa keshender óz jumysyn bastaidy. Bul týraly QazAvtoJol ulttyq kompaniiasynyń basqarma tóraǵasy Ulan Álipov aitty, dep habarlaidy QazAqparat.
«Jol boiyndaǵy qajetti infraqurylymmen qamtamasyz etý qashanda bizdiń basty nazarda. Sonyń ishindegi eń ózektisi ol ájethana. Osy oraida 2021 jyldan bastap elimizdegi iri joldar boiynda arnaiy keshender paida bolady. Onyń ishinde ájethanadan bólek, janar-jaǵar mai stansasy, dúken, dámhana jáne taǵy basqa jolaýshy tutynatyn qajettilik bolady. Búginde alǵashqy keshenniń qurylysy bastalyp ketti, ol aldaǵy jyly Qapshaǵai tasjolynda ashylady. Al jalpy Qazaqstan boiynsha 35 keshen salý jospary bar, ol úshin investitsiia esebinen 30 mlrd teńge jumsalady», - dedi U. Álipov.
Sondai-aq, kompaniia basshysy jol boiynda ájethana ornatýdyń ózindik problemalaryn da aityp ótti.
«Jol boiynda arnaiy keshen nemese jai ǵana ájethana ornatýdyń túitkildi jaǵy, bizde dalalyq jerler kóp, iaǵni eldimekenderdiń araqashyqtyǵy alshaq. Iaǵni el joq, jurt joq jerge zamanaýi ájethana ornatý tiimsiz. Sondai-aq, aidaladaǵy ájethanaǵa jaryq pen sýdy jetkizý qiyndyǵy da bar. Ózderińiz biletindei, biz joldar boiynda (KazWay) vakýýmdy ájethana ortanýdy qolǵa aldyq. Búginde elimiz boiynsha 10 shaqty KazWay ájethanasy jumys istep tur. Degenmen ol óziniń qymbattyǵymen halyq arasynda synǵa ushyrady. Qymbat bolý sebebi vakýým bizde shyǵarylmaidy ol Eýropadan ákelinedi jáne onyń bireýiniń quny 14 mln teńgeni quraidy. Osy máseleni ońtaily sheshý úshin biz keibir aimaqtarda ájethanamen qamtýdy biznes ókilderine berdik, al ol óz kezeginde aqyly bolady», - dedi ol.
