Aqtóbede «SENIM» densaýlyq saqtaý júiesi qyzmetkerleriniń salalyq kásipodaǵy respýblikalyq forým ótkizdi, dep habarlaidy QazAqparat.
Elimizde alǵash ret densaýlyq saqtaý salasyndaǵy ózekti máselelerdi sheshý, kásipodaq rólin kúsheitý baǵytynda forým ótti. Mamandyq bedelin jáne meditsina qyzmetkerlerine degen turǵyndar senimin arttyrý máselesi talqylandy.
Forýmǵa QR Kásipdaqtar federatsiiasynyń tóraǵasy Eraly Toǵjanov, oblys ákimi Ońdasyn Orazalin, QR Parlamenti Májilisiniń depýtaty Quralai Qaraken, Densaýlyq saqtaý ministrliginiń jaýapty hatshysy Botakóz Jakselekova qatysty.
Elimizdiń ár óńirinen 1200-den astam adam shaqyrylǵan. Aqtóbe oblysynyń ákimi Ońdasyn Orazalinniń aitýynsha, 2018 jyldan bastap óńirde «SENIM» densaýlyq saqtaý júiesi qyzmetkerleriniń kásipodaǵyna 60-qa jýyq bastaýysh uiym men 23 myńnan astam adam múshe boldy.
Aita keteiik, 2019 jyldyń 9 aiynda respýblika boiynsha óndiriste jazataiym oqiǵalardan 943 adam zardap shegip, 111 jumysshy qaza boldy. Aqtóbe oblysynda 68 adam zardap shegip, onyń 11-i qaza tapty. Kásipodaq densaýlyq saqtaý qyzmetkerleri úshin memlekettik kepilderdi kúsheitý sharalaryn qoldaidy. Meditsina qyzmetkerleriniń jalaqy máselesi erekshe kóńil bólýdi qajet etedi.
«Qazaqstannyń densaýlyq saqtaýdy damytý respýblikalyq ortalyǵynyń málimeti boiynsha respýblikada eń tómengi jalaqy Aqtóbe oblysynyń dárigerlerine tiesili. Ortasha jalaqy mólsheri - 110, 2 myń teńge. Al eń joǵarysy – Nur-Sultanda. Elordalyq dárigerler 170, 5 myń teńge alady. Meditsina qyzmetkerleriniń áleýmettik-ekonomikalyq áleýetimen qatar, bilikti kadrlarmen qamtamasyz etý, salany memlekettik qarjylandyrý deńgeii baǵyttaryndaǵy jumystar úzdiksiz jalǵasýy tiis», - dedi Eraly Toǵjanov
«SENIM» densaýlyq saqtaý júiesi qyzmetkerleriniń salalyq kásipodaǵy bastaýysh kásipodaq uiymdarynyń I respýblikalyq forýmyna qatysýshylar QR Úkimet músheleri men Parlamentke baǵyttalǵan qarar qabyldady.
Onda densaýlyq saqtaý júiesin damytýdyń ózekti máseleleri, sonyń ishinde meditsina qyzmetkerleriniń jalaqysyn kóterý, saladaǵy qoǵamdyq baqylaý, densaýlyq saqtaý júiesi qyzmetkerlerine laiyqty áleýmettik-eńbek jaǵdailaryn qamtamasyz etý qarastyrylǵan.
