Máskeý men Sankt-Peterbýrgtiń joǵary oqý oryndarynyń alǵashqy 74 túlegi diplomdaryn alyp, olardyń 43-i magistratýraǵa tústi. Bul týraly oblys ákimi Qyrymbek Kósherbaevtiń Reseidiń joǵary oqý oryndarynyń alǵashqy túlekterimen kezdesýi barysynda belgili boldy.
Esterińizge sala keteiik, 2014 jyldan bastap Máskeý men Sankt-Peterbýrgtiń ozyq oqý oryndarynda 452 qyzylordalyq stýdent Resei federatsiiasy úkimetiniń granty esebinen bilim alýda. Osy jyly alǵashqy 74 túlek oqýyn támamdady, olardyń 43-i magistratýrada oqýlaryn jalǵastyrady, 14-i oblystyń iri kásiporyndaryna - «SKZ-Ý» JShS, «Qyzylorda jaryǵy» JShS, «Ansar Servis» JShS, «Teplotehnik» JShS, mamandandyrylǵan memlekettik mekemelerge - indýstrialdy-innovatsiialyq damý, energetika jáne turǵyn úi-kommýnaldyq sharýashylyq basqarmalary men jastar resýrstyq ortalyǵyna jáne t.b. jumysqa ornalastyryldy. Jyl sońyna deiin taǵy 12 túlek jumysqa ornalasady, al 5 túlek ártúrli sebeptermen (qonys aýdarý jáne t.b. bailanysty) usynylǵan jumys oryndarynan bas tartqan.
Aita keteiik, kelesi jyly taǵy 150 túlek oqýyn bitiredi dep kútilýde.
Aimaq basshysy olardy oqýlaryn oidaǵydai aiaqtaýlarymen quttyqtap, eńbekterine tabys tiledi.
Qurmetti áriptester! Sizder búgingi meniń aimaq, el damýyna etene úles qosatyn bilikti maman, eńbek etýshi úzeńgiles áriptesime ainaldyńyzdar. Ata babamyz «Týǵan jerge týyńdy tik» dep beker aitpaǵan, Elbasymyz da «Patriotizm kindik qanyń tamǵan jerińe, ósken aýylyńa, qalań men óńirińe, iaǵni týǵan jerińe degen súiispenshilikten bastalady» dep aityp keledi. Men de óz kezeginde «Týǵan jerge taǵzym etý - paryzym, týǵan jerge qyzmet etý - qaryzym» degen urandy ustanamyn. Sondyqtan, bilim alyp, belgili bir mamandyq iesi atanyp, týǵan jerlerińe oralǵan qadamdaryńyz «oń bolsyn» dep tileimin», - dep aimaq basshysy jas mamandarǵa jyly lebizin bildirdi.
Óz kezeginde, bitirýshiler men olardyń ata-analary mektep bitirgennen keiin Reseidiń eń úzdik tehnikalyq joǵary oqý oryndarynda bilim alýǵa jáne jumysqa ornalasý múmkindigin jasaǵan oblys basshylyǵyna rizashylyqtaryn bildirdi.
«Mundai múmkindik basqa aimaqtarda bolmaǵanyn atap ótkim keledi. Máskeý men Peterbýrgte kóbinese syr boiylyq jastar oqýda, basqalary bizge jasalǵan materialdyq jáne rýhani qoldaýlaryńyzǵa qyzyǵa qaraityn. Qazir tipti Máskeýge arzan áýe reisteri uiymdastyrylǵan. Sondai-aq, oqyp júrgen kezdiń ózinde «Araltuz», «Baiken-U», «Qyzylorda jaryǵy», «Abzal i K» siiaqty iri kompaniialar jumys usyna bastady. Men «Qyzylorda jaryǵy» JShS-de jumys jasaimyn, ata-anam men oblys basshylyǵynyń úmitin aqtap, alǵan bilimimdi týǵan jerdiń igiligine jaratsam deimin»,-dedi «Qyzylorda jaryǵy» JShS-niń qyzmetkeri Elaman Meńdiqul.
Kezdesýde túlekter oblys ákimine «Orda» jastar qoǵamdyq birlestiginiń kýáligin tabystady. Bul uiym aǵymdaǵy jyldyń tamyz aiynda syr boiylyq jastardyń máselelerin sheshýge jáne reseilik joǵary oqý oryndaryndaǵy stýdentter men túlekterdi biriktirýge arnalyp quryldy.
Esterińizge salaiyq, biylǵy jyly 60-tan astam mektep túlegi Máskeý ulttyq tehnologiialyq zertteýler ýniversitetine, K.A. Timiriazev atyndaǵy Resei memlekettik agrarlyq ýniversitetine, Sankt-Peterbýrg memlekettik indýstrialdy tehnologiialar jáne dizain ýniversitetine, Innopolis ýniversitetine jáne Máskeý energetika institýtyna tústi. Sonymen birge, syr boiylyq jastarǵa mamandandyrylǵan «Kiberqaýipsizdik» jáne «Protsesterdi matematikalyq modeldeý» salasynda M.V.Lomonosov atyndaǵy Máskeý Memlekettik ýniversitetine jyl saiyn 20 grant jáne Eýraziialyq ekonomikalyq qoǵamdastyqtyń Parlamentaralyq Assambleiasy aiasyndaǵy joǵary oqý oryndaryna grant bólinedi. Aqparattandyrý men tehnologiialardy engizý boiynsha Tatarstan Respýblikasyndaǵy Innopolis ýniversitetinde aqparattyq jáne sandyq tehnologiialar boiynsha jyl saiyn qyzylordalyq túlekterdiń bilim alýyna kelisim jasalǵan. Aldaǵy ýaqytta «Skolkovo» innovatsiialyq ortalyǵymen áriptestik ornatý josparlanyp otyr.
Sondai-aq, az qamtylǵan jáne kóp balaly otbasylardan shyqqan 900-ge jýyq túlek oblys ákiminiń bilim grantyna ie boldy. 2018 jyly grant sany eki esege artty, onyń 70 paiyzy IT mamandyqtaryna bólinedi.
Biylǵy jyly oblys ákiminiń 116 stipendiaty oqýyn bitirdi, onyń jartysy (46 adam) jumysqa ornalassa, 7 -eýi magistratýraǵa tústi.
