«Jelige sholý» aidarynyń qonaqtary «Bolashaq» baǵdarlamasyna reseilik ýniversitetterdiń qosylýy, synama UBT baǵasy men jekemenshik mektepke qujat tapsyrý týraly oqyrman suraqtaryna jaýap berdi, dep habarlaidy "Ult aqparat" BǴM baspasóz qyzmetine silteme jasap.
Máselen, Ibek_q esimdi jeli qoldanýshysy: «Reseige bala jiberip oqytý qajet emes. Salyq tóleýshiniń esebinen Reseige oqytýǵa qarsymyn!», - degen pikir qaldyrypty. Osy oraida Bilim jáne ǵylym vitse-ministri Qýanysh Erǵaliev oqyrmanymyzdy tolǵandyrǵan taqyrypqa qatysty túsinikteme berdi.
Vitse-ministrdiń aitýynsha, biyl «Bolashaq» baǵdarlamasy boiynsha oqýǵa túsýge bolatyn ýniversitetterdiń sany kóbeidi. Tizimge jańadan qosylǵan joǵary oqý oryndarynyń arasynda reseilik ýniversitetter de bar. Máselen, osyǵan deiin 214 oqý orny bolsa endi 20-dan astam ýniversitet qosylyp, tańdaý múmkindigi ulǵaidy. Ekinshiden, bul aǵylshyn tilin jetik meńgermegen, biraq orys tilin jaqsy biletin jastarymyz úshin shetelde bilim alýdyń tamasha múmkindigi, - deidi vitse-ministr. Reseilik ýniversitetterdiń qosylǵany AQSh, Aziia nemese Eýropalyq joǵary oqý oryndaryn tańdaýǵa esh kedergi keltirmeidi. Ministrlik tek «Bolashaq» baǵdarlamasynyń geografiiasyn keńeitip, jastarǵa tańdaý aiasyn ulǵaityp berdi.
Marzhankb esimdi jeli qoldanýshy: «UBT tapsyrý testileriniń baǵasyn 2 esege túsirtemin degen siiaqty edi bilim ministri, biraq áli nátijesin kórip turǵan joqpyz. 4230 teńge tólep otyrmyz naýryzda tapsyratyn UBT-ǵa» dep jazypty. Ulttyq testileý ortalyǵynyń direktory Rýslan Emelbaev ministrdiń tapsyrmasy baiqaý UBT-syna qatysty aitylǵanyn túsindirdi. Tapsyrma oryndalyp, onyń baǵasy 2917 teńgeden 1458 teńgege deiin, eki ese arzandady. Al, qańtar, naýryz jáne tamyz ailaryndaǵy UBT joǵary oqý ornynda grant boiynsha nemese aqyly bólimde oqýǵa sertifikat beretin bolǵandyqtan naýqandy ótkizýge arnaiy memlekettik komissiia men Ulttyq testileý ortalyǵynyń barlyq qyzmetkerleri jumyldyrylady. Sol sebepti baǵasy joǵary. Alaida, ministrdiń tapsyrmasynan keiin onyń da baǵasy qaita qaralyp, 5640 teńgeden 4230 teńgege deiin arzandady.
Elenpape esimdi qoldanýshy jekemenshik mektepke qalai túsýge bolatynyn surapty.
QR BǴM «Qarjy ortalyǵy» AQ departament direktorynyń orynbasary Oljas Baiǵojin jekemenshik mektepterge qabyldaý komissiiasy arqyly qujat tapsyrýǵa bolatynyn aitty. Qajetti qujattar tizimi kóp emes: ata-ananyń ótinishi, balanyń týý týraly kýáligi men 3*4 sýreti. Biraq kei mektepterdiń qosymsha talaptary bolýy múmkin. Testileý nemese suhbattasý júredi. Jekemenshik mektepte oqý jónindegi kelisim qabyldaý komissiiasy shyǵarǵan qorytyndy boiynsha jasalady. Oljas Baiǵojinniń aitýynsha, memlekettik qoldaýdyń nátijesinde 2019 jyldan beri elimizde 95 myń oqýshyǵa arnalǵan 287 jekemenshik mektep ashylǵan.
