Resei teatrlary Qazaqstanǵa gastroldik saparmen keledi. Bul týraly Reseidiń mádeniet ministriniń orynbasary Pavel Stepanov aitty.
"Biyl Reseide teatr jyly. Sondyqtan biz osy salaǵa erekshe kóńil bólip otyrmyz. Kúzde Obraztsov atyndaǵy qýyrshaq teatry, Krasnoiarsk opera jáne balet teatrynyń gastroli bolady. Sondai-aq, "Astana Opera", Lermontov atyndaǵy orys drama teatry, Qaraǵandy akademiialyq teatry syndy qazaqstandyq teatrlar da Reseige barady", - dedi Stepanov Qazaqstan men Resei úkimetaralyq komissiiasynyń XXI otyrysynda.
Stepanov Qazaqstan astanasynda Qazaqstan men Resei arasyndaǵy mádeni-gýmanitarlyq áriptestik jónindegi shaǵyn komissiia otyrysy ótkenin aitty.
"Biz kino salasyndaǵy áriptestik múmkindigin de talqyladyq. Kino prokatynyń avtomattandyrylǵan júiesin qurýdaǵy tájiribemizben bólisýge ázirmiz", - dedi ol.
Stepanovtyń aitýynsha, Resei mádeni áriptestik aiasynda Qazaqstanda Abaidyń 175 jyldyǵyn atap ótýge erekshe mán beredi.
