Foto: instagram.com/ekurchanov
24 jastaǵy tanymal reseilik bloger Evgenii Kýrchanov Máskeýden Almatyǵa kóship kelgen. Jas jigit Qazaqstanda til mektebin ashyp, elimizdiń aimaqtaryn aralap, blogtarynda alǵan áserin bólisedi, - dep habarlaidy Tengrinews.kz.
Evgenii Kýrchanov Vologdada kópbalaly otbasynda dúniege kelgen. Tanymaldylyqqa ie bola bastaǵannan keiin Máskeýge kóshken.
"Meni tańǵaldyrǵany, qazaqstandyqtardyń Vologda qalasy týraly ándi biletini, birge aita bastaidy, tipti Reseide bul ándi kóbi bilmeidi, biraq munda bári biledi. Aǵylshyn tilinen sabaq berýdi sheshtim, maǵan unaidy.
TikTok-ta blog bastaýǵa keńes bergen, Instagram jáne Vk.com-da blogtarym boldy, biraq TikTok-tyń aýditoriiasy óte jaqsy. Aǵylshyn tili týraly beinerolikter túsire bastadym, olar jaqsy qaralym jinady. Blogymnyń kontseptsiiasy - adamdardy ázil arqyly aǵylshyn tilin úirenýge yntalandyrý", - dedi ol.
2-3 jyldan keiin jigit TikTok-ta 6 million oqyrman jinaǵan.
"Meniń onlain aǵylshyn mektebim bar, komandam bar, jalaqy tóleimin. Reseide Instagram, TikTok jabyldy, kýrstarymdy esh jerde jarnamalai almadym, jarnama satyp alý múmkin bolmady. Jarnamany Reseide monopoliiaǵa ainalǵan Vk.com saity arqyly ǵana satyp alýǵa bolady, bul óte qymbat. Dosym ekeýmiz Qazaqstanda jarnama satyp almaq boldyq, ol Reseiden áldeqaida arzanǵa shyqty.
Bir dosym Qazaqstanǵa kel, IP-ge qujat tapsyr dep keńes berdi. Men bir-eki aptaǵa kelemin dep oiladym, biraq qazir Qazaqstanda turyp jatqanyma 4 aidan asty. Men - dinge senetin adammyn. Dosym tús kórgen. Men oǵan Qazaqstan sońǵy úmitim ekenin aitqan ekenmin. Ol Qazaqstan týraly eshteńe bilmeidi, ol munda bolmaǵan, meniń josparlarym týraly eshteńe bilmegen", - dedi Evgenii.
Birneshe ai buryn bloger Qazaqstan týraly jańa TikTok paraqshasyn ashqan, onda qazir 500 myńǵa jýyq jazylýshysy bar.
"Meniń atym - Evgenii. Dosym qazaqsha atym Jandos bolatynyn aitty, sondyqtan TikTok jelisinde ózimdi Jandos Kýrchanov dep atadym, adamdarǵa bul unady. Maǵan túrli halyqtyń salt-dástúri, til úirený unaidy, bul óte qyzyq. Jańa paraqshamda qazaq tilin qalai úirenetinimdi, qazaq halqynyń salt-dástúrlerimen tanysyp, ulttyq taǵamdardy kórsetýdi jón kórdim", - dedi bloger.
Bloger qazaqstandyq dosy oǵan Almatyǵa kóshýge keńes bergenin aitty.
"Men Qazaqstan boiynsha eki ret saparǵa shyqtym. Almaty oblysyna baryp, Sharyn shatqalyn kórdim. Meni tańǵaldyratyny, Qazaqstanda kórinistiń tez ózgeretini: shól bolsa, sosyn birden taýlar, sosyn jasyl jelekter, sosyn jartas, peizaj únemi ózgerip otyrady. Ekinshi ret saparǵa shyqqanymda, Aqtóbege bardym. Semeide, Óskemende boldym jáne Nur-Sultanda bir saǵat aialdaǵanym bar", - dedi Evgenii.
Reseilik azamat qazaqstandyqtar orys tilin óte jaqsy meńgergenine tańǵalǵanyn aitty.
"Munda men ózimdi úidegidei sezinemin, orys tilinde sóileitinder kóp. Máskeýde men qazaqstandyq bir áielden páter jaldap turdym. Ol maǵan Qazaqstanda orystardy onsha unatpaitynyn aitty. Munda kelgende, óte saq bolýǵa tyrystym, biraq bul jerde múlde olai emes ekenin túsinemin. Maǵan ońtústik oblystarda qazaqsha sóileitinder kóbirek ekenin aitty.
Biraq ózim de mádenietke, tilge qurmetpen qaraýǵa tyrysqandyqtan bolar, eshbir keleńsizdikti kezdestirgen joqpyn. Men ózim qazaq tilin úirenip júrmin, ony nasihattaýǵa tyrysamyn, qazaq tilinde jarnamalyq integratsiialar boldy. Kassada aqsha tólep turyp, qazaq tilin úirenip júrgenimdi aitsam, satýshylar maǵan: "Biz de" dep jaýap beredi. Men kóbiniń oryssha sóileitinine tańǵaldym. Maǵan Almatyda oryssha bilmeseń qiynyraq siiaqty kórindi", - dedi ol.
Bloger qazaq sózderi men adam attarynyń orys tilinde aitylý erekshelikterine de toqtaldy.
"Áleýmettik jelilerde Prezident Toqaevtyń familiiasyn "a" árpi arqyly aitýyma qatysty heit boldy. Men ony "o" árpi arqyly aitýǵa tyrysqanymmen, báribir adamdar basqasha estidi. Bizde "a" árpi arqyly aitylatyn esimder óte kóp, mysaly, Oksana esimi. Men Toqaevtyń aǵylshynsha sóilegeni týraly video túsirdim, ol óte jaqsy sóileidi. Video astyndaǵy árbir pikir familiianyń aitylýy týraly boldy.
"Teńge" sóziniń aitylýy týraly men de basqa reseilikter siiaqty "tenge" deitinmin. Qazir úirendim, bárin durys aitamyn", - dedi Kýrchanov.
Kýrchanov ázirge Reseige oralý jospary joq ekenin atap ótti.
"Reseidegi oqiǵalardan keiin men dúnietanymymdy ózgerttim, birinshisi pandemiiamen bailanysty boldy, men barlyq jospar ózgerýi múmkin ekenin túsindim. Aqpandaǵy oqiǵalardan keiin men jospar qurýdy qoidym. Keiingi ýaqytta Máskeýde turdym, onda Almatydaǵydai taýlar joq, árine, saiabaqtar bar, biraq mundaǵyny Máskeýmen salystyrýǵa bolmaidy. Meniń oiymsha, kúizelistegi Máskeýge oralýdyń maǵynasy joq", - dep túiindedi Evgenii.
