Reseidiń oppozitsiialyq saiasatkeri ári qoǵam qairatkeri Vladimir Kara-Mýrza Máskeýde bireýlerdiń ańdyp júrgenin baiqaǵan. Ol bul týraly The Insider basylymyna aitty.
Kara-Mýrzanyń sózinshe, azamattyq kiimdegi adamdar aldymen onyń kóliginiń artynan Ý 563 SA nómirli mashinamen júrgen, keiin ol qoǵamdyq kólikke otyrǵanda álgi adamdar sońynan ergen. Oppozitsioner kafege kirgende kórshi ústelge kúdikti adamdar otyrǵanyn aitady.
Bellingcat zertteý toby 563 SA nómirli avtokólik Resei federaldyq qaýipsizdik qyzmetine (FSB) tirkelgenin aitty. The Insider basylymy jariialaǵan sýretterdiń birinde bul kólik Resei prezidenti ákimshiliginiń ǵimaraty janynda turaqta tur.
11 aqpan kúni Bellingcat toby Navalnyidy byltyrǵy ýlanýyna deiin ańdyp kelgen FSB qyzmetkerleri Kara-Mýrzany da ańdyǵan dep málimdedi. Kara-Mýrza 2015 jáne 2017 jyldary eki ret ýlaný belgilerimen aýrýhanaǵa túsken. Bellingcat toby FSB qyzmetkerleriniń saiasatkerdi ýlanarynda aldynda ańdyp júrgenin aitady.
"Sáikes keletin saparlarynyń sany – jeti baǵyt, 14 reis – munyń statistika turǵysynan kezdeisoq sáikestik bolýy múmkin ekenin kórsetedi. Kara-Mýrza tanymaldyǵy men ańdýdyń turaqty sipaty FSB-nyń osy toby jasaǵan ózge qastandyqtarǵa edáýir uqsaidy" deidi Bellingcat.
- 2015 jyly áriptesterimen kezdesýi kezinde Vladimir Kara-Mýrzanyń háli kúrt nasharlaǵan. Dáriger intoksikatsiia saldaryna búiregi syr bergen dedi. Saiasatker uzaq ýaqyt boiy komada boldy. Frantsiiada jasalǵan saraptama saiasatkerdiń aǵzasynda aýyr metall mólsheri shamadan tys joǵarylap ketkenin anyqtaǵan. Biraq Reseidiń sot-meditsinalyq saraptamasy ýlanýdy rastamady.
- 2017 jyly aqpanda oppozitsioner aýyr hálde Máskeý aýrýhanasyna tústi. Aýrý belgileri 2015 jylǵy jaǵdaidaǵyǵa uqsas boldy. Dárigerler tiri qalý yqtimaldyǵy bes paiyzdan aspaidy degen. Biraq saiasatker tiri qalyp, esin jiia aldy.
- Kara-Mýrzanyń ózi bul jaǵdaidyń artynda Resei biligi tur dep sanaidy. Azattyq radiosy Orys qyzmetine bergen suhbatynda ol "Bul – qasaqana ýlaý. Oǵan meniń Vladimir Pýtinniń jaqyn ainalasyna qarsy jekelegen Batys sanktsiialaryn salýdy alǵa jyljytý boiynsha kóp jylǵy jumysym sebep" degen. Kara-Mýrza – AQSh-tyń 2012 jyly qabyldanǵan "Magnitskii zańyn" qabyldaýǵa yqpal etken Resei saiasatkerleriniń biri. Zań burynǵydai búkil eldi emes, jekelegen adamdardy sanktsiialaýǵa múmkindik berdi. Osy zań aiasynda Reseidiń adam quqyǵyn buzýǵa qatysy bar degen sheneýnikteri men biznesmenderine sanktsiia salyndy. Sanktsiialyq tizimge kirgenderdiń AQSh-taǵy múlki buǵattalyp, olardyń elge kirýine tyiym salynady.
