Armeniianyń Ázerbaijanmen shekarasyndaǵy áýe keńistiginde reseilik Mi-24 tikushaǵyn jyljymaly zenittik zymyran kesheninen (JZZK) atqan, ekipajdyń eki múshesi qaza tapty, taǵy bireýi jaraqat aldy. Bul týraly dúisenbide Resei Qorǵanys ministrligi málimdedi, dep habarlaidy TASS agenttigi.
«9 qarashada Máskeý ýaqytymen 17:30 shamasynda Armeniia Respýblikasynyń aýmaǵy boiynsha 102-shi Resei áskeri bazasynyń avtokolonnasymen Nahichevan Avtonomiialyq respýblikasynyń (Ázerbaijan Respýblikasy) shekarasyna jaqyn ornalasqan Erash armian eldi mekeniniń janyndaǵy áýe keńistiginde reseilik
Mi-24 tikushaǵyna JZZK-dan oq jaýdyrǵan. Zymyran soqqysynyń saldarynan tikushaq basqarýdy joǵaltyp, Armeniiadaǵy taýly aimaqqa qulaǵan», - dep habarlady reseilik áskeri vedomstvo.
«Eki adam qaza tapty. Ortasha aýyrlyqtaǵy jaraqat alǵan bireýi ornalasý áýe ailaǵyna evakýatsiialandy», - dep atap ótti Qorǵanys ministrliginen.
Mi-24 tikushaǵy Armeniianyń áýe keńistiginde, urys aimaǵynan tys jerde jyljymaly zenittik zymyran kesheninen atyldy, dep habarlady Resei Qorǵanys ministrliginiń resmi ókili, general-maior Igor Konashenkov.
Óz kezeginde, AZERTADJ habarlaǵandai, oqiǵaǵa bailanysty Ázerbaijan SIM málimdeme jasady. «Ázerbaijan tarapy kezdeisoqtyq sipatyndaǵy jáne Resei tarapyna qarsy baǵyttalmaǵan osy qaiǵyly oqiǵaǵa bailanysty Resei tarapynan keshirim suraidy. Ázerbaijan tarapy qaza tapqan ekipaj músheleriniń otbasylaryna kóńil aitady jáne zardap shekkenderdiń tezirek saýyǵyp ketýin tileidi. Ázerbaijandyq tarap tiisti ótemaqy tóleýge daiyn ekenin málimdeidi»,- delingen Ázerbaijan SIM málimdemesinde .
