Koronavirýs órshigen Qytaidyń Hýbei provintsiiasynan Resei Federatsiiasynyń azamattaryn evakýatsiialaýǵa daiyndaý jumystaryna qatysqan reseilik eki diplomat ekiaptalyq karatinge jatqyzylady. Bul týraly juma kúni QHR-daǵy Resei elshisi Andrei Denisov tilshilerge aityp, diplomattar karantinde elshilik aýmaǵynda bolatynyn málim etti, dep habarlaidy TASS.
Elshiniń aitýynsha, diplomattar Ýhanǵa reseilikterdi evakýatsiialaý sharasyna shuǵyl jetekshilik etý úshin barǵan. «Olardyń (RF azamattarynyń) sol jaqta bolýyn uiymdastyrý, sýmen, qarapaiym taǵammen qamtamasyz etý kerek boldy. Osynyń barlyǵyn elshiliktiń eki qyzmetkeri jasady», - dedi ol.
«Olar búgin nemese erteń tańerteńmen Beijińge qaitýy kerek. Sol jaqta oqshaýlanǵan ǵimarat bar, olarǵa bárin daiyndap qoidyq: sý, internet, teledidar, úige arnalǵan aiaq-kiimder, tońazytqyshta azyq-túlik bar», - dep habarlady elshi.
«Qytai biligi 2019 jyldyń jeltoqsan aiynyń sońynda Hýbei provintsiiasynyń Ýhan qalasynda 2019-nCoV virýsynan paida bolǵan jańa pnevmoniia túrin tirkedi. QHR-dan bólek, infektsiiany 24 eldiń azamattary juqtyrǵany anyqtaldy, onyń ishinde Resei de bar. Dúniejúzilik densaýlyq saqtaý uiymy indetke bailanysty halyqaralyq dárejedegi tótenshe jaǵdai jariialap, ony oshaǵy kóp epidemiia dep sipattady. Sońǵy málimetter boiynsha, Qytaida aýrý juqtyrǵandar sany 31,1 myń adamnan asty, 630 adam mert boldy, 1,5 myńnan astamy saýyqty», - dep jazady TASS.
RF elshiliginiń baǵalaýy boiynsha, Hýbei provintsiiasynda Reseidiń 341 azamaty bolǵan, olardyń 183-i diplomattarmen bailanysqa shyqty. 5 aqpan kúni Resei Áskeri-ǵarysh kúshteriniń eki borty Ýhan qalasynan 144 adamdy Túmenge jetkizdi. Olardyń 128-i reseilik, jáne EAEO pen Ýkraina azamattary bar. RF bas sanitarlyq dárigeri Anna Popovanyń habarlaýynsha, Reseige evakýtsiialanǵan azamattar ózderin jaqsy sezinedi, olarda koronavirýstyń jańa túriniń belgileri joq.
