Resei parlamenti joǵary palatasynyń (federatsiia keńesi) múshesi Edýard Isakov Ýkrainadaǵy soǵysty aiyptaǵan qyzy Dianany "satqyn" dep atady. Senat depýtaty Telegram-arnasynda qyzynyń "ákesin, otbasy men otanyn satyp ketkenin" jazdy, - dep habarlaidy Azattyq.
Jazbaǵa Diana Isakovanyń juma kúni BBC-diń Orys qyzmeti jáne "Medýza" basylymyna bergen suhbaty túrtki bolǵan. Onda depýtattyń qyzy Ýkrainadaǵy soǵysqa qarsy ekenin aityp, jýyrda Reseiden ketkenin aitqan.
"Qyzyń satyp ketken kezde aýzyńa sóz túspei qalady" dep jazdy Isakov. Onyń sózine qaraǵanda, sáýir aiynda qyzy soǵysqa qarsy aktsiialarǵa qatysqan. Ol qyzyna "arnaiy soǵys operatsiiasynyń mańyzdylyǵyn túsindirýge tyrysqanmen" nátije bolmaǵan.
Isakov qyzynyń birinshi nekeden týǵanyn, úsh jastan bastap tárbiesimen basqa adamdardyń ainalysqanyn aitty. Depýtattyń aitýynsha, qyzy psihonevrologiia dispanserinde tirkeýde tur, ózin LGBT ókili retinde ataǵan. "Onymen tildesý qiyn" dedi. "Onyń Reseige qarsy ustanymyn bilgennen keiin onymen sóilesýdi doǵardym, aqsha, baspanamen qamtamasyz etpeimin" dedi depýtat.
Buǵan deiin Diana Isakova BBC aqparat agenttigine bergen suhbatynda ákesimen kikiljińge kelip qalǵanyn, birneshe ret sýitsid jasamaq bolǵanyn aitqan. Ol muny "qatań tárbieniń saldary" dep atady. Diana Isakovanyń aitýynsha, ákesi ony "tárbielemedim" dese de, ómirine kóp yqpal etken.
Edýard Isakov Ulybritaniia, Eýroodaq jáne Kanadanyń sanktsiia tizimine ilingen. Ol - soǵysty belsene qoldaǵan saiasatkerlerdiń biri.
