Májilis depýtattary zymyran bólshekteri qulaityn aýdan retinde Reseidiń Qazaqtan jerin paidalanýyna qatysty zań jobasymen jumys merzimin 2020 jylǵa deiin uzartty, dep habarlaidy "Ult aqparat" Sputnik Qazaqstan agenttigine silteme jasap.
Qazaqstan men Resei úkimeti arasyndaǵy kelisimde "Baiqońyr" ǵarysh ailaǵynan ushyrý kezinde "Soiýz" tasymaldaǵysh zymyrandarynan bólinetin bólikterdiń qulaý aýdany retinde Qazaqstannan jer ýchaskesin bólýdiń uiymdastyrýshylyq-quqyqtyq negizderi aiqyndalady. Bul zań jobasyn qaraý merzimi biylǵy jyldyń 31 jeltoqsanyna deiin belgilengen edi.
"Biraq 23 qarashada Qorǵanys jáne aeroǵarysh ónerkásibi ministrliginen hat kelip tústi, olar zań jobasy boiynsha qorytyndy ázirleý merzimin 2019 jylǵa deiin uzartýdy suraidy. Bul atalǵan qujatty qazirgi kezde ázirlenip jatqan "1995 jylǵy 23 jeltoqsandaǵy Qazaqstan men Resei arasyndaǵy Baiqońyr qalasynyń mártebesi jáne ondaǵy atqarýshy organdardy qurýdyń tártibi men olardyń mártebesi týraly kelisimge ózgerister engizý týraly hattamany ratifikatsiialaý týraly" zań jobasymen bir mezgilde qarastyrý qajettigine bailanysty bolyp otyr", — dedi májilistiń jalpy otyrysynda halyqaralyq ister, qorǵanys jáne qaýipsizdik komitetiniń múshesi Janat Jarasov.
Osyǵan bailanysty komitet zań jobasy boiynsha qorytyndy ázirleý merzimin 2019 jyldyń 31 jeltoqsanyna deiin uzartýdy usyndy. Májilis depýtattary bul usynysty qoldady.
