Resei Federatsiiasynyń Sochi qalasynda "SIFT / Sochi - 2018" halyqaralyq týristik forýmy aiasynda QR Mádeniet jáne sport ministrliginiń qoldaýymen "Áziret Sultan" memlekettik tarihi-mádeni qoryq-mýzeiiniń kórmesi ashyldy.
Qoja Ahmet Iasaýidiń muralary men Túrkistan óńirinde ornalasqan kieli jerlerdi nasihattaýǵa arnalǵan kórmeniń lentasyn Qazaqstan Respýblikasynyń Resei Federatsiiasyndaǵy Elshiliginiń Krasnodar ólkesindegi Qurmetti Konsýly Mohnachev Vitalii Viktorovich qiyp, álemdik jetekshi týristik ortalyqtar nazaryna usynylatyn jádigerlerdiń mańyzdylyǵyna toqtaldy.
Týrister úshin keseneniń ár jyldardaǵy beineleri men Túrkistannyń kórinisteri, taiqazan, shyraǵdan sýretteri, Qoja Ahmet Iasaýi men taiqazannyń maketteri tanystyrylsa, Iasaýi kesenesi men Qylýet jerasty meshiti, Shyǵys monshasy, Gaýhar ana, Úkasha ata kesenesi men qudyǵy, Saýran qalashyǵy syndy tarihi oryndardyń 3D týr nusqasy Elbasymyzdyń tsifrlandyrý júiesi negizinde daiyndalyp, halyqaralyq kórmede kózildirik arqyly kórsetildi.
Odan bólek, qoryq-mýzeidiń tarihi oryndary men mýzei haqynda úsh tilde jaryq kórgen býklet kitapshalary men jádigerlerdiń katalog kitaptary da kórme ekspozitsiiasynan oryn aldy.
Sonymen qatar, otandyq týristik ortalyqtar «Qazaqstanǵa saiahat jasa» jarnamalyq uranymen túrli mádeni baǵdarlama usynyp, elimizdiń kórikti jerlerimen birge qazaqtyń salt-dástúr, ádet-ǵurpy jáne tól ónerimen tanystyrýda. Qazaqstannan barǵan delegattardyń "Qara jorǵa" biine tánti bolǵan reseilikter asyq atý ulttyq oiynyna da belsene kiristi. Sondai-aq, qazaqtyń ulttyq taǵamdaryn nasihattap jatqan delegattar qurt isteý tásilderin kórsetti.
"Áziret Sultan" memlekettik tarihi-mádeni qoryq-mýzeiiniń baspasóz qyzmeti
