Reseidiń Samara oblysynda júk kóligi, jeńil kólik jáne shaǵyn jolaýshylar avtobýsy soǵylǵan jol apatynda 12 adam qaza tapty, dep habarlaidy TASS agenttigi.
«Qazirgi málimet boiynsha jol-kólik oqiǵasynan 12 adam qaza tapty. Taǵy 12 adam túrli jaraqat aldy. Bes adam jansaqtaý bóliminde jatyr», - delingen Reseidiń Tergeý komiteti taratqan habarlamada.
Oblys basshysy Dmitrii Azarovtyń aitýynsha, jol apatynan zardap shekkender Syzrandaǵy ortalyq aýrýhanaǵa jetkizilgen. Samaraǵa kómekke Toliatti qalasynan jedel járdem brigadalary jiberilgen. Jol apatynan Ýlianov jáne Samara oblystarynyń turǵyndary zardap shekken.
Jol apaty juma kúni keshke federaldyq «Ýral» M-5 tas jolynyń 873-shaqyrymynda Samara oblysynyń Zaborovka kentiniń janynda bolǵan. Júk kóligi, jeńil kólik jáne shaǵyn jolaýshylar avtobýsy bir-birine soǵylǵan.
