12 tamyzda Reseidiń federatsiia keńesi tóraǵasynyń halyqaralyq ister boiynsha orynbasary ári Resei egemendigin qorǵaý boiynsha komissiia múshesi Andrei Klimov Máskeýde ádil sailaý talabymen ótip jatqan qarsylyq aktsiialaryna "Batys elderi aralasyp otyr" dep málimdedi.
Onyń sózinshe, azamattardyń mitingige shyǵýyna AQSh yqpal etip otyr. Klimov 10 tamyzda Máskeýde ótken mitingige "ózge elge qyzmet etemin dep ant bergen eki azamattyǵy bar" adamdar qatysty dedi. Mysal retinde Klimov reper Oxxxymiron-dy atap, "34 jyl ómiriniń kóp bóligin Batys Eýropada, Ulybritaniiada ótkizdi, endi kelip Máskeý qalalyq dýmasyna depýtat bolǵysy keledi" dedi. Ol aktsiiaǵa qatysýshylarǵa quqyqtyq keńes berýshiniń de AQSh azamaty ekenin aitty.
Alaida, Azattyqtyń Orys qyzmetiniń jazýynsha, Federatsiia keńesi músheleriniń kóbinde shetelde jyljymaityn múlik bar. Máselen, joǵarǵy palatanyń Tambov oblysy boiynsha ókili Aleksandr Babakovtyń Parijde quny 16 million dollar turatyn páteri bar. Al internette bilikti balaǵattaǵany úshin jazaǵa tartý zańynyń avtory Andrei Klishastyń Shveitsariiada záýlim úii bar. Keńestiń Týlsk oblysy boiynsha ókili Dmitrii Savelev Ulybritandiiadan 500 sharshy metrlik úi satyp alǵan. Federatsiia keńesiniń ózge músheleri Liýbov Glebovanyń — Germaniiada, Vitalii Bogdanovtyń Italiiada úii bar.
"Kremliovskii bezbashennik" telegram-kanalynyń málimeti boiynsha, Federatsiia keńesiniń keminde jeti múshesiniń shetel azamattyǵy bar.
Budan buryn Máskeý meri Sergei Sobianin Máskeý qalalyq dýmasyna oppozitsiiadan úmitkerlerdi jiberý talabymen ótken "narazylyq sharasyna qatysýshylardyń deni máskeýlikter emes" dep málimdegen. Áleýmettik zertteýlerge qaraǵanda, ótken senbide Saharov dańǵylynda ótken mitingke kelýshilerdiń 80 protsenti máskeýlikter, qalǵan 17 paiyzy — Máskeý oblysynyń turǵyndary.
Máskeý qalalyq dýma sailaýyna táýelsiz úmitkerlerli ótkizýdi talap etip jatqan oppozitsiianyń aktsiiasy bir aidan beri jalǵasyp jatyr. Osy ýaqyt aralyǵynda politsiia úsh myńnan astam adamdy ustady.
