12 تامىزدا رەسەيدٸڭ فەدەراتسييا كەڭەسٸ تٶراعاسىنىڭ حالىقارالىق ٸستەر بويىنشا ورىنباسارى ەرٸ رەسەي ەگەمەندٸگٸن قورعاۋ بويىنشا كوميسسييا مٷشەسٸ اندرەي كليموۆ مەسكەۋدە ەدٸل سايلاۋ تالابىمەن ٶتٸپ جاتقان قارسىلىق اكتسييالارىنا "باتىس ەلدەرٸ ارالاسىپ وتىر" دەپ مەلٸمدەدٸ.
ونىڭ سٶزٸنشە, ازاماتتاردىڭ ميتينگٸگە شىعۋىنا اقش ىقپال ەتٸپ وتىر. كليموۆ 10 تامىزدا مەسكەۋدە ٶتكەن ميتينگٸگە "ٶزگە ەلگە قىزمەت ەتەمٸن دەپ انت بەرگەن ەكٸ ازاماتتىعى بار" ادامدار قاتىستى دەدٸ. مىسال رەتٸندە كليموۆ رەپەر Oxxxymiron-دى اتاپ, "34 جىل ٶمٸرٸنٸڭ كٶپ بٶلٸگٸن باتىس ەۋروپادا, ۇلىبريتانييادا ٶتكٸزدٸ, ەندٸ كەلٸپ مەسكەۋ قالالىق دۋماسىنا دەپۋتات بولعىسى كەلەدٸ" دەدٸ. ول اكتسيياعا قاتىسۋشىلارعا قۇقىقتىق كەڭەس بەرۋشٸنٸڭ دە اقش ازاماتى ەكەنٸن ايتتى.
الايدا, ازاتتىقتىڭ ورىس قىزمەتٸنٸڭ جازۋىنشا, فەدەراتسييا كەڭەسٸ مٷشەلەرٸنٸڭ كٶبٸندە شەتەلدە جىلجىمايتىن مٷلٸك بار. مەسەلەن, جوعارعى پالاتانىڭ تامبوۆ وبلىسى بويىنشا ٶكٸلٸ الەكساندر باباكوۆتىڭ پاريجدە قۇنى 16 ميلليون دوللار تۇراتىن پەتەرٸ بار. ال ينتەرنەتتە بيلٸكتٸ بالاعاتتاعانى ٷشٸن جازاعا تارتۋ زاڭىنىڭ اۆتورى اندرەي كليشاستىڭ شۆەيتسارييادا زەۋلٸم ٷيٸ بار. كەڭەستٸڭ تۋلسك وبلىسى بويىنشا ٶكٸلٸ دميتريي ساۆەلەۆ ۇلىبريتاندييادان 500 شارشى مەترلٸك ٷي ساتىپ العان. فەدەراتسييا كەڭەسٸنٸڭ ٶزگە مٷشەلەرٸ ليۋبوۆ گلەبوۆانىڭ — گەرمانييادا, ۆيتاليي بوگدانوۆتىڭ يتالييادا ٷيٸ بار.
"كرەمليوۆسكيي بەزباشەننيك" تەلەگرام-كانالىنىڭ مەلٸمەتٸ بويىنشا, فەدەراتسييا كەڭەسٸنٸڭ كەمٸندە جەتٸ مٷشەسٸنٸڭ شەتەل ازاماتتىعى بار.
بۇدان بۇرىن مەسكەۋ مەرٸ سەرگەي سوبيانين مەسكەۋ قالالىق دۋماسىنا وپپوزيتسييادان ٷمٸتكەرلەردٸ جٸبەرۋ تالابىمەن ٶتكەن "نارازىلىق شاراسىنا قاتىسۋشىلاردىڭ دەنٸ مەسكەۋلٸكتەر ەمەس" دەپ مەلٸمدەگەن. ەلەۋمەتتٸك زەرتتەۋلەرگە قاراعاندا, ٶتكەن سەنبٸدە ساحاروۆ داڭعىلىندا ٶتكەن ميتينگكە كەلۋشٸلەردٸڭ 80 پروتسەنتٸ مەسكەۋلٸكتەر, قالعان 17 پايىزى — مەسكەۋ وبلىسىنىڭ تۇرعىندارى.
مەسكەۋ قالالىق دۋما سايلاۋىنا تەۋەلسٸز ٷمٸتكەرلەرلٸ ٶتكٸزۋدٸ تالاپ ەتٸپ جاتقان وپپوزيتسييانىڭ اكتسيياسى بٸر ايدان بەرٸ جالعاسىپ جاتىر. وسى ۋاقىت ارالىعىندا پوليتسييا ٷش مىڭنان استام ادامدى ۇستادى.
