Resei arnaiy qyzmetiniń burynǵy polkovnigi Sergei Skripal men onyń qyzy Iýliia Ulybritaniiadan Jańa Zelandiiaǵa qonys aýdardy. Bul týraly derekózine súiengen silteme jasaǵan The Sunday Times basylymy habarlady.
Basylym málimetinshe, Skripal kósher aldynda qyzymen birge bir jyl boiy Britaniiada qupiia barlaý qyzmetiniń qorǵaýynda bolyp, qaýipsiz jerde turyp kelgen. Aqparatqa qaraǵanda, olardyń aty-jóni ózgertilip, qarjylai kómek kórsetilgen.
2018 jylǵy naýryzda Ulybritaniianyń Solsberi qalasynda Sergei Skripal men qyzy Iýliia qasaqana ýlandyrýdyń qurbany bolyp, es-tússiz kúide aýrýhanaǵa túsken. Olarǵa qarsy sovettik “Novichok” ýyn qoldanǵan.
Uzaq ýaqyt emdeýden soń ekeýi de aman qalǵan. Odan keiin Skripaldardan múldem habar bolmaǵan.
London olarǵa qastandyqty Kreml uiymdastyrǵan dep málimdep, Resei prezidenti Vladimir Pýtindi aiyptaǵan.
Ulybritaniia biligi Solsberidegi qastandyqty “Aleksandr Petrov” jáne “Rýslan Boshirov” degen adamdardyń atyn jamylyp kelgen reseilik áskeri barlaý qyzmetkerleri jasaǵan dep sanaidy. Bul oqiǵany zerttegen Bellingcat toby men The Insider basylymy “Petrov” pen “Boshirovtyń” shyn aty-jóni Aleksandr Mishkin jáne Anatolii Chepiga dep habarlaǵan.
Máskeý Skripalge qastandyq jasaýǵa qatysy joǵyn aityp, aiyptaýdy “Reseige qarsy baibalamdy qozdyrý maqsatymen ádeii uiymdastyrǵan” dedi.
