«Otandastar» qory Resei Federatsiiasy Astrahan oblysynyń eki aýdanynda qazaq tilin oqytatyn kabinetter ashty, dep habarlaidy "Ult aqparat" Qordyń baspasóz qyzmetine silteme jasap.
«Nikita Ysqaqov atyndaǵy Semibýgoren orta mektebi» mýnitsipaldy qazynalyq jalpy bilim berý mekemesi qazaq tiline arnap jeke kabinet bóldi. Ol kabinette qazaqtyń ulttyq mádenieti, óneri, ádebieti, turmystyq buiymdarymen tanysýǵa bolady. Qor ókili Sábi Túitebekov atalǵan kabinetke Qazaqstannan arnaiy ákelingen syilyq-«Qasterli qalam» kitabyn syilady. Kabinet Otandastar Qorynan teledidar, videokamera, noýtbýk tárizdi qundy syilyqtar jetkizilgennen soń ashylady. Mektep direktory Rimma Ibragimova Qazaqstannan arnaiy kelgen qonaqty ystyq yqylaspen qarsy alyp, qandastarǵa qamqorlyǵy úshin Qor men Dúniejúzi qazaqtary qaýymdastyǵyna alǵys aitty», - delingen baspasóz baianynda.
Osyndai ekinshi kabinet Volodar aýdany Kalinin aýylynda ashylady. Akademik Erejep Mámbetqaziev atyndaǵy Kalinin orta mektebiniń direktory Arman Nurlievtyń aitýynsha qazaq tili kabineti Qor syilaǵan eń zamanaýi jabdyqtarmen jabdyqtalady.
Aita keteiik, Astrahan oblysynda resmi derek boiynsha 160 myń etnikalyq qazaqtyń basym bóligi aýyldyq jerlerde turady. Máselen, Kalinin aýyly turǵyndarynyń 99,9 paiyzy qazaq. Olar ulttyq salt-dástúrdi saqtaý úshin barlyq múmkindikti paidalanýda. Qordyń aýyl mektebinde qazaq tili kabinetin ashýy shet eldegi qandastarymyzdy tarihi otanymen burynǵydan da jaqyndastyra túspek.
Eske salsaq, buǵan deiin Reseidiń Túmen oblysynda qazaq synyby ashylǵandyǵy týraly habarlaǵan bolatynbyz.
