Reseide koronavirýsqa bailanysty aimaq basshylary 24 maýsymǵa belgilengen Jeńis kúni paradyn ótkizýden birtindep bas tartyp jatyr. Kýrsk oblysynyń biligi Jeńis kúnine arnalǵan merekelik sharany 23 tamyzda ótkizetinin aitty.
Buǵan qosa, Iaroslavl oblysy, Mordoviia respýblikasy, Orynbor oblysy da Jeńis kúnin atap ótýdi keiinge qaldyrǵan.
Iaroslavl oblysynyń basshysy ázirge qoǵamdyq shara uiymdastyratyn kez emes dep málimdedi. Pskov oblysynyń biligi "soǵys ardagerleriniń densaýlyǵyna qaýip tóndirmeýdi" jón kórgen.
Buǵan deiin Kamchatsk, Perm ólkesi, Tomsk oblysy, Belgorod qalasy epidemiologiialyq jaǵdaiǵa bailanysty Jeńis kúnin toilaýdan bas tartqan. Orlov oblysynyń gýbernatory da "koronavirýs infektsiiasy juǵý qaýpi seiilmegendikten" parad ótkizbeitinin habarlaǵan.
Buǵan deiin prezident Vladimir Pýtin 24 maýsymda Jeńis parady ótetinin málimdep, ol kúndi demalys retinde belgilegen. Resei armiiasynyń bas qolbasshysy Oleg Saliýkov 24 maýsymda Reseidiń 28 qalasynda áskeri parad ótedi dep aitqan.
Reseidiń qalǵan qalalarynda parad ótkizý-ótkizbeý máselesin aimaq biligi epidemiologiialyq ahýaldy eskere otyryp ózderi sheshedi. Novosibirsk qalasynda parad ótedi, biraq kórermen bolmaidy.
