Sońǵy eki jylda Soltústik Qazaqstan oblysyna Reseiden saparlaityn týrister sany eki esege artty. Bul týraly Qazaqstan men Reseidiń Óńiraralyq yntymaqtastyǵynyń XV forýmynda Soltústik Qazaqstan oblysynyń ákimi Qumar Aqsaqalov málim etti, dep habarlaidy QazAqparat.
«Nursultan Ábishuly, Sizdiń tapsyrmańyz boiynsha Imantaý-Shalqar kýrort aimaǵyn damytýǵa arnalǵan keshendi jospar ázirlenip jatyr. Osy oraida Astana men Resei óńirleri baǵytyndaǵy joldarǵa kúrdeli jóndeý jumystaryn júrgizýge ekpin qoiylyp otyr. Kóliktik infraqurylymdy jaqsartýdyń arqasynda týristerdiń jolda júrý ýaqyty 30 paiyzǵa qysqardy», - dedi oblys basshysy.
Onyń sózine qaraǵanda, sońǵy eki jylda osy salada qabyldanǵan sharalardyń nátijesinde Reseiden Soltústik Qazaqstan oblysyna saparlaityn týrister sany eki esege artqan.
«Aldaǵy jyly bul kórsetkish taǵy da ósedi dep boljanýda. Sáikesinshe, shekara beketterine júkteme artady. Ásirese, jaz kezinde shekarada uzyn-sonar kezekti baiqaimyz. Sondyqtan shekaradaǵy beketterden ótetinderdi baqylaý rásimin jeńildetý múmkindigin qarastyrýdy usynamyz», - dedi Q. Aqsaqalov.
Sonymen qatar óńir basshysy Imantaý-Shalqar aýmaǵyn jáne ózge de jobalardy damytýǵa nietti investorlarǵa qoldaý jasalatynyn tilge tiek etti. Biznesti qoldaý aiasynda týrizm nysandaryna barlyq qajetti injenerlik kommýnikatsiialar tartylatyn bolady.
Budan buryn habarlanǵandai, Qazaqstan men Reseidiń Óńiraralyq yntymaqtastyǵynyń XV forýmynda QR Mádeniet jáne sport ministri Arystanbek Muhamediuly eki eldiń týrizm salasyn damytýdyń múmkindikterin baiandady. Sonymen qatar onda Aqtaý sammiti Kaspii teńizindegi týrizmdi damytýǵa yqpal etkendigi aityldy.
Aita keteiik, búging forým «Qazaqstan men Reseidegi týrizmdi damytýdyń jańa joldary men úrdisteri» taqyrybynda ótip jatyr.
