Ýkraina Reseidegi elshiliginde ornalasqan bes sailaý ýchaskesin osy eldegi Qazaqstan, Grýziia jáne Finliandiianyń elshilikterine kóshiredi. Bul týraly "Ýkrainskaia pravda" gazetinde jariialanǵan maqalada eldiń syrtqy ister ministri Pavel Klimkin jazdy.
Klimkinniń sózinshe, sailaý ýchaskeleri Ýkrainanyń diplomatiialyq ókildikterinen úsh el elshilikterine Reseide turatyn Ýkraina azamattarynyń qaýipsizdigin qamtamasyz etý maqsatynda aýystyrylady.
Ministr Kiev, eń aldymen, "ákimshilik resýrs pen úgit-nasihat tegeýrinine qaramastan sailaý komissiiasynyń múshesi bolýǵa nemese sailaýǵa qatysýǵa bel býǵan Ýkraina azamattarynyń qaýipsizdigine alańdaitynyn" aitady.
Sońǵy jyldary Máskeýdiń úgit-nasihaty Reseidegi Ýkrainaǵa qarsy kóńil-kúidi kúsheitkenin aitqan Klimkin daýys berý kúni qaýipti arandatýlar bolmaitynyna kepildik bere almaitynyn aitady.
"Ýkrainalyq sailaýshylar da, qyzmetkerlerimiz de, túptep kelgende diplomatiialyq ókildikter de zardap shegýi múmkin. Budan ózge, daýys berýge qatysqandardyń bári Federaldyq qaýipsizdik qyzmetiniń baqylaýyna mindetti túrde alynatyny jáne uzamai qýǵynǵa ushyraýy múmkin ekeni kúmánsiz" dedi Klimkin.
Ýkraina syrtqy ister ministriniń sózinshe, Kiev "basqynshy el aýmaǵynda erkin ári ádil sailaý ótkizý múmkin emes jáne onyń saiasi ári zańdyq máni joq" dep sanaidy.
Ýkrainada prezident sailaýy 31 naýryzda ótedi. Prezidenttikke kandidattardy tirkeý 31 jeltoqsanda bastaldy. Kandidattar 2019 jyldyń 3 aqpanyna deiin tirkelýi tiis. Sailaý komissiiasy kandidattar esimin 8 aqpanda jariialaidy.
Is basyndaǵy prezident Petr Poroshenkonyń sailaýǵa túsýge quqyǵy bar. Biraq ol sailaýǵa qatysatyny týraly áli málimdeme jasamady.
"Batkivshina" partiiasynyń lideri Iýliia Timoshenko 2018 jyly maýsymda sailaýǵa túsetinin habarlaǵan. "Sotsis" áleýmettik uiymynyń zertteýinshe, sailaýda negizgi báseke Poroshenko men Iýliia Timoshenko arasynda ótedi.
