QR Syrtqy ister ministrligi Resei Federatsiiasynyń Vladimir oblysynda Qazaqstannan shyqqan avtobýspen bolǵan iri jol apatyna qatysty pikir bildirdi, dep habarlaidy "Ult aqparat".
«Vladimir oblystyq TJM-niń málimetterine súiensek, 13-aimaqqa jatatyn tirkeý nomeri UDA668 Mercedes markaly jolaýshylar avtobýsy atalǵan óńirde iri jol kóligi apatyna ushyrady», - dedi QR Syrtqy ister ministrliginiń baspasóz hatshysy Ánýar Jainaqov Feisbýktegi paraqshasynda.
Málimetterge qaraǵanda, jol kólik apaty saldarynan 17 adam qaza taýyp, 5 adam aýrýhanaǵa jetkizildi. Avtobýsta barlyǵy 55 adam bolǵan.
«Zardap shekkender Petýshinskidegi aýdandyq klinikalyq aýrýhanaǵa jetkizildi. Qazirgi ýaqytta Reseidegi qazaqstandyq diplomattar qaza tapqandar men zardap shekkenderdiń tulǵalary men azamattyǵyn anyqtap jatyr», - deidi Ánýar Jainaqov.
Aita keteiik, QR SIM Resei Federatsiiasynyń Vladimir oblysynda bolǵan iri jol apatynda qazaqstandyqtar qaza boldy degen aqparatty tekserip jatqandyǵy týraly habarlaǵan bolatynbyz.
