Reseide Stavropol jol politsiiasynyń basshysy Aleksei Safonov 19 million rýbl para aldy degen kúdikke ilindi. Áleýmettik jelilerde politseidiń "altyn jalatylǵan" úiiniń sýretteri qyzý talqylanyp jatyr. Olardy Memlekettik Dýmanyń depýtaty Aleksandr Hinshtein Telegram arnasynda jariialaǵan, - dep habarlaidy Tengrinews.kz.
Memlekettik Dýma depýtatynyń aitýynsha, Stavropol ólkesiniń Jol qozǵalysy qaýipsizdigi memlekettik inspektsiiasynyń basshysy Aleksei Safonov bastaǵan barlyq joǵarydaǵy shendi ustaldy. Olarǵa qylmystyq top uiymdastyryp, para aldy, bilikti teris paidalandy degen aiyp taǵyldy.
RIA Novosti málimetinshe, Stavropol ólkesindegi Aleksei Safonov bastaǵan qylmystyq top múshelerine 19 million rýbl para alý deregi boiynsha qylmystyq is qozǵaldy.
Safonov jáne ol basqaratyn toptyń alty múshesi, onyń ishinde Jol qozǵalysy qaýipsizdigi memlekettik inspektsiiasy basqarmasynyń burynǵy bólim basshysy Aleksandr Arjanýhin, inspektor Vitalii Melchikov jáne taǵy tórt adam ustaldy. Tergeýshiler olarǵa qatysty qamaýǵa alý túrindegi bultartpaý sharasyn tańdaý týraly ótinish jiberýdi josparlap otyr.
Tergeý nusqasy boiynsha, Safonov bastaǵan qylmystyq top birneshe jyl boiy Stavropoldegi astyq daqyldary men inertti materialdardy tasymaldaýshylarǵa aqshaǵa ruqsat qaǵazyn jasap, ákimshilik zańnamany buza otyryp, júk tasymalyn kedergisiz júzege asyrýǵa múmkindik berdi. Osylaisha, top músheleri 19 million rýblden asa somada asa iri mólsherde para alǵan.
Safonovqa 15 jylǵa deiin bas bostandyǵynan aiyrylý qaýpi tónip tur, oǵan alǵan parasynan jetpis ese kóp - 1,3 milliard rýblden asa aiyppul salynady.
Ustalǵan polkovniktiń jýynatyn bólmesinde altyn rakovina men dárethana anyqtaldy.
Úide jattyǵý zaly da bar.
Tergeý komiteti ustalǵan jol politsiiasy basqarmasy basshysynyń úiinen video jariialady.
