Reseide koronavirýs juqtyrǵandar 400 myńnan asty. 31 mamyrda jedel shtab osyndai málimet taratty. Ótken táýlikte 9268 adamnan koronavirýs tabylǵan. Naýqastar sany qatarynan úsh kún artqan.
Senbi kúni elde 138 adam koronavirýstan qaitys bolǵan. Bul aldyńǵy kúnmen salystyrǵanda az. Biliktiń aitýynsha, elde koronavirýstan jalpy 4693 adam qaitys bolǵan.
Barlyǵy 405 843 adamǵa virýs juqqany anyqtalǵan. 171 myńnan astam adam jazylǵan. Emdelip jatqandar sany apta basynda azaiǵanmen qazir qaita artqan.
Máskeýde bir kúnde shamamen 2,5 myń adamnan koronavirýs tabyldy. Bastapqyda qalada naýqastar kóbeigenmen qazir azaiýy baiqalady.
Koronavirýspen bailanysty ásirese adam ólimine qatysty reseilik statistika mamandar arasynda kúmán týǵyzady. Máskeý biligi sáýir aiynda tirkelgen adam ólimi týraly málimetti jariialaǵan. Oǵan sáikes, COVID-19 diagnozy qoiylǵan qaitys bolǵan adamdardyń jartysyna jýyǵy koronavirýs boiynsha resmi statistikaǵa engizilmegen. Biliktiń aitýynsha, olarǵa koronavirýs infektsiiasy juqqanmen óliminiń negizgi sebebi koronavirýs emes.
Sońǵy kezde Reseidiń birqatar aimaqtarynda karantin erejeleri jumsara bastaǵan. Máskeýde 25 mamyrdan bastap aptasyna úsh ret keste boiynsha serýendeýge ruqsat etilgen.Buǵan qosa, azyq-túlik emes dúkender men qyzmet kórsetý salasyndaǵy birqatar kásiporyndar jumys istei bastady. Degenmen maska rejimi qatańdatylǵan - endi maskany tek ǵimarat qana emes, kóshede taǵyp júrý mindet.
