Foto: Regnum | Kýnashir araly, ońtústik Kýril bóligi
Resei biligi keiingi 22 jylda alǵash ret Japoniia ókilderimen Kýril araldarynda balyq aýlaý máselesi boiynsha keńes júrgizýden bas tartty. Buǵan eki el arasyndaǵy qarym-qatynastyń azaiýy sebep bolǵan dep aitylady. Tokio Reseidiń Ýkrainaǵa basqynshylyǵyna bailanysty Batys elderiniń sanktsiiasyna qosylǵan, dep habarlaidy Azattyq radiosy.
Máskeý Kýril araldarynda birigip sharýashylyq júrgizý máselesin talqylaýdan da bas tartqan.
1998 jyldan beri Resei men Japoniia arasynda teńiz kásibi salasynda yntymaqtastyq ornatý týraly kelisim bar. Resei jyl saiyn Japoniiamen Kýril araldary mańynda balyq jáne ózge de teńiz ónimderin aýlaýǵa kvota berý máselesin kelisip otyrǵan.
Reseidiń Japoniiadaǵy elshiliginiń ókilderi reseilik "RIA Novosti" agenttigine atalǵan másele boiynsha kelissóz belgisiz merzimge toqtatylǵanyn rastady. Olar balyq aýlaý maýsymy ýaqytynda bastalýy úshin kelissózdiń qalpyna keltirilýine kúsh salatynyn aitty.
Aita keteiik, 2022 jyly 24 aqpanda Resei Ýkrainaǵa basyp kirgennen keiin Japoniia Reseidiń joǵary laýazymdy tulǵalary men týystaryna, prezident Vladimir Pýtin men onyń jaqyndaryna, bankter men kásiporyndarǵa sanktsiia salyp, Reseidi saýdadaǵy birqatar jeńildikterden aiyrǵan. Tokio Ýkrainaǵa áskeri jáne gýmanitarlyq kómek kórsetetinin málimdegen.
Resei Japoniiany "dos emes" elder qataryna jatqyzǵan jáne Japoniiamen Ońtústik Kýrildegi ortaq sharýashylyqtaryn retteý boiynsha dialogtan shyǵatynyn, Qara teńiz ekonomikalyq áriptestigi uiymyndaǵy Japoniianyń áriptes mártebesin joiatynyn málimdegen. Japoniia premer-ministri Fýmio Kasida muny "aqylǵa qonymsyz" sheshim dep ataǵan.
2022 jyly Ýkrainada soǵys bastalǵaly beri Resei japon teńizshilerine Ońtústik Kýrilde balyq aýlaýǵa tyiym salǵan. 1998 jylǵy kelisim nátijesinde Máskeýge sondai quqyq berilgen edi. Resei jaǵy kelisimde kórsetilgen tólemaqy tólenbegen soń, kelisimdi toqtatqan.
