Belarýstiń Gomel oblysynda úsh saǵattan asa ýaqyttan beri Resei men Ýkraina arasynda kelissóz júrip jatyr, - dep habarlaidy Tengrinews.kz tilshisi.
UNIAN agenttiginiń málimetinshe, Ýkrainadan kelgen delegatsiia quramynda "Slýga naroda" fraktsiiasynyń tóraǵasy David Arahamiia, Ýkrainanyń qorǵanys ministri Aleksei Reznikov, Ýkraina prezidenti keńsesi basshysynyń keńesshisi Mihail Podoliak, TKG-daǵy Ýkraina delegatsiiasynyń basshysy Andrei Kostin, halyq depýtaty Rýstem Ýmerov jáne Ýkraina syrtqy ister ministriniń orynbasary Nikolai Tochitskii bar.
Resei delegatsiiasynda RF-nyń Belarýstegi elshisi Boris Gryzlov, depýtat Leonid Slýtskii, RF SIM basshysynyń orynbasary Andrei Rýdenko, RF Qorǵanys ministriniń orynbasary Aleksandr Fomin bar. Delegatsiia Resei prezidentiniń kómekshisi Vladimir Medinskii basshylyǵymen keldi.
Kezdesý bastalar aldynda Belarýs SIM basshysy Vladimir Makei kelissóz qatysýshylaryna qaýipsizdik qamtamasyz etilgenin, kez kelgen másele sheshiletinin aitty.
Ýkraina prezidentiniń keńsesi basshysynyń keńesshisi Aleksei Arestovich ýkrainalyq delegatsiia kelissózderde barlyq reseilik áskerdi, sonyń ishinde Qyrym men Donbasstan shyǵarýdy talap etetinin aitty. Bul týraly "Strana.ua" ýkrainalyq agenttigi Telegram-arnasynda habarlady.
Máskeý resmi túrde kelissózder men olardyń mazmunyna túsinikteme bermedi. Gazeta.ru málimeti boiynsha, Resei prezidentiniń baspasóz hatshysy Dmitrii Peskov jýrnalisterge kelissózderdiń maqsattaryn jariialamady.
"Degenmen, bul kelissózder tynyshtyqta ótýi kerek. Biz bul kelissózder bir kún buryn bastalmaǵanyna ókinemiz. Kelissózder túnde bastalýy kerek edi, bizdiń delegatsiia daiyn boldy, biraq qarsy tarap qazir ǵana keldi. Taǵy da qaitalap óteiin, men eshteńe jariialaǵym kelmeidi. Olar keiinirek bizge ózderi habarlaidy", - dedi ol.
Izraildik Jerusalem Post basylymy málimetinshe, reseilik kásipker Roman Abramovich Ýkraina men Resei Federatsiiasy arasyndaǵy kelissózderdi jeńildetý úshin Belarýste júr.
"Resei-Izrail milliarderi Roman Abramovich Ýkrainanyń ótinishi boiynsha Belarýste jáne soǵysty toqtatý maqsatynda Resei men Ýkraina arasyndaǵy kelissózderge kómektesedi", - dep jazdy gazet.
Eki eldiń kelissózderin Eýroodaq, Qytai jáne Germaniia quptady.
Ýkrainanyń Joǵarǵy Radasynyń Telegram-arnasynda saǵat 19.48-de (astana ýaqyty boiynsha) kelissózderdiń aiaqtalǵany týraly habarlama taraǵan bolatyn.
Al RIA Novosti diplomatiialyq ortadaǵy derekkózge silteme jasap kelissózder áli de júrip jatqanyn habarlaǵan.
