Ol Qazaqstan 2010 jyly EQYU sammitiniń Astana deklaratsiiasynda bekitilgen jan-jaqty, teń jáne bólinbeitin qaýipsizdik tujyrymdamasyn árqashan jaqtaitynyn aitty.
"Ózderińiz biletindei, Qazaqstanda Reseimen tarihi turǵydan tyǵyz saiasi-ekonomikalyq jáne mádeni-gýmanitarlyq bailanys qalyptasqan. Dúniejúzindegi eń uzyn shekaraǵa ie bola otyryp, reseilik áriptestermen saýda-ekonomikalyq yntymaqtastyqtyń qalyptasqan deńgeiin saqtaýǵa niettimiz. Jalpy, quqyqtyq jáne saiasi jaǵynan bizdiń memleketter odaqtas jáne strategiialyq seriktes. Sonymen qatar, qaqtyǵys aiaqtalǵannan keiin Ýkrainamen de keń aýqymdy ózara tiimdi yntymaqtastyqtyń joǵary dinamikasyn tez arada qalpyna keltirýge múddelimiz. Bul eki el arasyndaǵy áskeri qaqtyǵys qazaqstandyqtardyń júregine batty. Sondyqtan, Máskeý men Kiev taiaý bolashaqta kelispeýshilikterdi beibit jolmen sheshýdiń jolyn tabady dep shyn júrekten senemiz", - dedi Muhtar Tileýberdi.
Sondai-aq, ol Resei-Ýkraina kelissózderine boljam jasap, Qazaqstan qarýly qaqtyǵysty toqtatý, gýmanitarlyq máselelerdi sheshý jáne halyqaralyq qatynastardaǵy shielenisti azaitý joldaryn izdeýdegi bitimgershilik kúsh-jigerge jan-jaqty úles qosyp otyrǵanyn aitty.
"Qazaqstan álemdik qaýymdastyqtyń jáne eń aldymen Túrkiianyń Ýkrainanyń beitarap, iadrosyz jáne bloktan tys mártebesi týraly kelisimderge qoljetkizýge baǵyttalǵan Resei-Ýkraina kelissózder úderisin bastaý jónindegi deldaldyq kúsh-jigerin quptaidy. Biz kelissózder soǵys qimyldaryn odan ári toqtatýǵa, Donbass mártebesin anyqtaýǵa jáne sanktsiialyq qysymdy joiýǵa yqpal etetinine shyn júrekten senemiz", - dedi Tileýberdi.
Sondai-aq, spiker Qazaqstannyń Reseige qarsy sanktsiialarǵa resmi kózqarasyn jariialap, onyń elimizge tigizetin áserin baǵalady.
"Elimiz, árine, BUU Qaýipsizdik keńesiniń qararymen engizilgen sanktsiialardy qospaǵanda, sanktsiialardy memleketaralyq qarym-qatynasta qysym jasaý quraly retinde qoldanýǵa dástúrli túrde qarsy. Kez kelgen ekonomikalyq nemese saiasi sanktsiialardy qoldaný, tájiribe kórsetkendei, halyqaralyq daýlar men qaqtyǵystardy sheshýdiń tiimdi joly emes. Sondyqtan, Qazaqstan Resei Federatsiiasyna qarsy sanktsiialyq qysymǵa qosylyp, qandai da bir túrde Resei múddesine nuqsan keltiretin jáne seriktestik rýhqa qaishy keletin qadamdarǵa barýǵa nietti emes. Óziniń ulttyq múddesin qorǵai otyryp, Qazaqstan bul sanktsiialar ekonomikamyzdyń damýyna eleýli áserin tigizbeý úshin bar kúshin salyp jatyr", - dedi Muhtar Tileýberdi.
Qazaqstan Úkimeti qazirgi ýaqytta osy máseleler boiynsha Batystaǵy áriptesterimen konsýltatsiialar júrgizip jatyr, dedi spiker.
"Ekinshi rettik sanktsiialardy boldyrmaý jáne olardyń halyqqa, óndirýshilerge, eksporttaýshylarǵa keri áserin azaitý úshin Qazaqstan sanktsiialardy ainalyp ótýge qandai da bir maqsatty qadamdar jasaýǵa nietti emes. Bul rette Qazaqstan Eýraziialyq ekonomikalyq odaq pen Dúniejúzilik saýda uiymynyń tolyqqandy múshesi bola otyryp, Reseimen jáne basqa da eldermen saýda-sattyq qarym-qatynasyn odan ári damytady. Jalpy alǵanda, Resei ekonomikasynyń oqshaýlanýy uzaq merzimdi perspektivada, árine, búkil álemdik ekonomikanyń damýyna ziianyn tigizedi. Osyǵan bailanysty halyqaralyq qaýymdastyq Máskeý men Kiev arasyndaǵy qaqtyǵysty beibit jolmen sheshý jolyndaǵy izdenisterge óz úlesin qosýy kerek dep esepteimiz. Biz óz tarapymyzdan Resei men Ýkraina arasyndaǵy turaqty beibitshilikke qoljetkizý úshin barlyq qajetti kúsh-jigerdi jumsaimyz", - dep túiindedi premer-ministrdiń orynbasary.
