Máskeý men Kiev arasynda tutqyn almasý máselesi Ýkrainanyń Mariýpoldegi "Azovstal" zaýytyn tastap shyqqan jaýyngerlerin sottaǵan soń ǵana qozǵalýy múmkin. Bul jóninde Resei syrtqy ister ministriniń orynbasary Andrei Rýdenko málimdedi, dep habarlaidy Azattyq.
"Barlyq máseleni tutqynǵa túskenderge laiyqty jaza kesilgen soń ǵana qarastyramyz, oǵan deiin aiyrbas týraly sóz qozǵaýǵa erte" dedi Rýdenko.
Mariýpoldegi "Azovstaldi" eki aidan asa Resei áskerine bermei ustaǵan Ýkraina jaýyngerleri ótken aptada zaýyttan shyqqan. Olardy reseishil separatister baqylaýyndaǵy aýmaqqa áketken. Osydan soń Resei men Ýkrainanyń tutqyn almastyrý máselesi jii sóz bola bastaǵan.
Ýkraina prezidenti Vladimir Zelenskii Ýkraina jaýyngerlerin Mariýpolden evakýatsiialaý jáne keiin Resei tutqyndaryna aiyrbastaý jóninde halyqaralyq uiymdarmen kelisim bolǵanyn aitqan. Resei bul jóninde eshteńe aitqan joq. Kremlshil basylymdar el biligin olardy sottaýǵa shaqyryp jatyr. Ózin-ózi táýelsiz dep jariialaǵan separatistik "DHR" basshysy Denis Pýshilin "Ýkraina jaýyngerleri áskeri tribýnalǵa tartylatyny sózsiz" dep málimdegen.
Resei qorǵanys ministrligi "2,5 myń jaýynger tutqynǵa tústi" dep esepteidi. Olardyń keiingi taǵdyry beimálim. Reuters pen Resei BAQ-tary separatistik "DHR" baqylaýyndaǵy túzeý koloniiasyna áketkenin habarlaǵan.
"Azov" polki komandiri Denis Prokopenkonyń áieli Katerina olarmen telefonmen arqyly sóileskenin, "Azovstalden" shyqqan ýkrain tutqyndarynyń jaǵdaiy qalypty ekenin aitqan. Prokopenko jaralylardyń kópshiligi Elenovkadaǵy túrmede ekenin, aýyr jaralylardyń Novoazovsk aýrýhanasynda qalǵanyn eskertken.
"Olardyń telefonmen sóilesýine halyqaralyq Qyzyl krest uiymy septigin tigizgen" dep jazady Britaniianyń The Guardian gazeti. Prokopenko erkin sóilese aldy ma, joq pa belgisiz. Óitkeni jaǵdailaryn egjei-tegjeili aita bastaǵanda telefon bailanysy úzilgen.
