26 naýryzda Resei qalalarynda jemqorlyqqa qarsy kúres atty uranmen halyq jappai ereýilge shyqty. Halyqtyń ashýyn týdyrǵan jaǵdai - qymbat múlik pen kóptegen elitaly turǵyn úilerdiń satyp alynýy. Bul daýǵa RF premer-ministri Dmitrii Medvedevtiń qatysy bolýy múmkin. Alaida úkimet basshysy atalmysh máselege qatty ýaiymdamaityn sekildi. Ol halyq ereýilge shyqqan sátte shańǵy teýip, demalyp júrgen. Bul málimet áleýmettik jeliler arqyly belgili boldy, dep habarlaidy reseilik BAQ.
Dmitrii Medvedevtiń «Instagram» áleýmettik jelisindegi jeke paraqshasynda @ispiridonoff esimdi qoldanýshy oǵan «Sálem! Kúniń qalai ótýde?» dep suraq qoiǵan.
Óz kezeginde úkimet basshysy saýalǵa: «Jaman emes, shańǵy teptim», - dep jaýap bergen.
Jeli qoldanýshysy saýalyn premer-ministrge 8 naýryz kúni jariialaǵan sýretiniń astynda qaldyrǵan. Fotoda RF premer-ministri: «Qurmetti áielder qaýymy, sizderdi merekelerińizben quttyqtaimyn! Sizderge baqyt pen mahabbat tileimin» dep jazǵan. Ol sýretin halyqaralyq áielder kúni merekesinde jariialaǵan.
Al @ispiridonoff jeli qoldanýshysynyń «Instagram» jelisindegi paraqshasynda Perm qalasynda jemqorlyqqa qarsy kúres atty uranmen ótken halyq ereýiliniń fotolary beinelengen.
Esterińizge sala keteiik, keshe, 26 naýryz kúni Reseida halyq jemqorlyqqa qarsy mitingke shyqty. Ony oppozitsioner Aleksei Navalnyi uiymdastyrǵan. Ol qazirgi tańda qamaýda otyr.
Politsiianyń málimetine sáikes, Máskeýdiń ortalyq kóshesi Tverskide 8 myńnan astam adam ereýilge shyqqan. Al oppozitsiia 25-30 myń turǵynnyń mitingke qatysqandyǵyn aitýda.
Ereýil kezinde máskeýlik tártip saqshylary 900-den astam adamdy qamaýǵa alǵan. Mitingke qatysqan azamattardyń aitýynsha, ustalǵan turǵyndardyń qatarynda kámelettik jasqa tolmaǵandar da bar eken. Qolǵa túsken belsendilerdiń jartysy áli kúnge deiin qamaýdan bosatylmaǵan. Keibir málimetterge sáikes, tártip saqshylary mitingke shyqqandary taiaqpen uryp-soqqan.
Halyqtyń ashýyn týdyrǵan Navalnyi qory júrgizgen zertteýdiń qorytyndysy. Iaǵni qymbat múlik pen kóptegen elitaly turǵyn úilerdiń satyp alynýy. Bul daýly oqiǵaǵa qazirgi RF premer-ministri Dmitrii Medvedevtiń qatysy bolýy múmkin.
Qordyń júrgizgen zertteýine sáikes, úkimet basshysy qymbat dúnie-múlikterdiń iesi bolýy múmkin. Ol aktivterdi kommertsiialyq emes qorlar arqyly basqarady-mys. Al atalmysh qorlardyń basynda premer-ministrdiń birge oqyǵan dostary otyr eken.
Navalnyi qory premer-ministrdiń menshiginde Italiianyń Toskana oblysynda júzim alqaby, iahta, elitaly turǵyn úilerdiń bar ekendigin anyqtaǵan. Alaida bul dúnie múlik resmi túrde ofshorlyq kompaniiaǵa tiesili. Biraq Navalnyi qorynyń qyzmetkerleri bul qymbat múlikter Dmitrii Medvedevtiń jeke menshiginde degen pikirde.
Sonymen qatar jemqorlyqqa qarsy miting Máskeýden basqa, Sankt-Peterbor, Ekaterinbýrg, Barnaýl, Tomsk, Cheboksary, Qazan jáne t.b. qalalarda ótken. Oǵan myńnan astam adam qatysqan. Mitingke qalalyq bilik tarapynan ruqsat berilmegen. Ereýilge shyqqandardyń basty talaby - premer-ministrge qatysty tergeýdiń júrgizilýi.
