Resei úkimeti elge shetel jumysshylaryn aldyrý jónindegi pilottyq jobany maquldady. Joba aiasynda Ózbekstannan 10 myń qurylysshy ákelinbek. Bul týraly Resei basylymdary habarlady.
Quqyqtyq aqparat portalynda Ózbekstannan 10 myń migrant ákelý jobasy sipattalǵan. Oǵan qaraǵanda, ózbek qurylysshylaryna "Spýtnik Lait" ekpesin salmaq.
Pilottyq jobaǵa qurylys, eńbek, densaýlyq, bilim, ishki ister, tótenshe jaǵdailar ministrlikteri jáne Rospotrebnadzor mekemesi qatyspaq.
Resei qurylys ministrligi ózbek jumysshylaryn qataryna alýǵa nieti bar mekemelerdiń tizimin jasaityny habarlanyp otyr.
"Qaýlyny qabyldaý Ózbekstannan 10 myń eńbek migrantyn ákelý jóninde naqty qadamǵa kóshýge múmkindik berip otyr" dedi ministr orynbasary Nikita Stasishin sanitarlyq-epidemiialyq talaptardyń saqtalatynyn eskertip.
Osynyń aldynda "Kommersant" basylymy ózbek migranttaryn "iri infraqurylym obektileriniń" qurylysyna tartatynyn habarlaǵan. Olardyń arasynda "Vostochnyi" kosmodromy da bar. Ózbek jumysshylaryna patent berilip, onda jumys berýshi mekemeniń aty jazylady.
Basylymnyń jazýynsha, Reseide jumys kúshi tapshy bolyp otyr. Qyrkúiekte Máskeý ákimshiligi 200 myń jumysshy jetispei jatqanyn aitqan.
