Resei oppozitsioneri Aleksei Navalnyi qurǵan Jemqorlyqpen kúres qory zańdy tulǵa retinde joiyldy. Bul qor Reseide "shetel agenti" jáne "ekstremistik uiym" dep tanylǵan.
Federaldy salyq qyzmetiniń Biryńǵai memlekettik reestrindegi málimetterge qaraǵanda, Navalnyidyń qory 31 tamyzda tizimnen shyǵyp qalǵan, dep jazady Azattyq.
Qordyń burynǵy direktory Ivan Jdanov osydan keiin Resei Ádilet ministri Konstantin Chýichenkoǵa hat jazyp, bul qordy "shetel agentteri" tiziminen de alyp tastaýdy ótingen.
Qor bul reestrge 2019 jyly engizilgen. Biyl maýsym aiynda Máskeý qalalyq soty qala prokýratýrasynyń shaǵymynan keiin Navalnyidyń Jemqorlyqpen kúres qoryn, Azamattardyń quqyǵyn qorǵaý qoryn (bul da "shetel agenti" sanatyna qosylǵan) "ekstremistik uiym" dep tanyǵan. Osy sheshiminde sot bul uiymdardyń jumysy tez arada toqtatylatynyn habarlaǵan.
Prokýratýra Jemqorlyqpen kúres qoryn "liberal urandar jamylyp, áleýmettik jáne saiasi-qoǵamdyq jaǵdaidy ýshyqtyrǵysy keledi" dep aiyptaǵan" dep jazady "Mediazona".
Halyqaralyq Amnesty International quqyq qorǵaý uiymy men Reseidegi "Memorial" quqyq qorǵaý ortalyǵy Máskeý qalalyq sotynyń sheshimin aiyptaǵan. Amnesty International muny azamattardyń belsendiligine jasalǵan shabýyl dep ataǵan. Quqyq qorǵaýshylardyń aitýynsha, sot sheshimi Reseidegi myńdaǵan adamnyń oi-pikirin erkin bildirip, jiyn ótkizý quqyǵyn shekteidi.
