10 aqpan kúni Reseidiń Urals markaly munaiynyń bir barreli 3,4 myń rýblden tómen baǵamen satyldy. Bul - sońǵy eki jyldaǵy eń tómengi kórsetkish, dep habarlaidy Azattyqtyń Orys qyzmeti.
Saýda barysynda bir barrel munaidyń baǵasy 2,6 paiyzǵa, iaǵni 3390 rýblge deiin tómendep, 2018 jyly 15 aqpandaǵy shamasyna deiin tústi. Resei munaiynyń baǵasy tórtinshi apta boiy úzdiksiz tómendep keledi, osy ýaqyt ishinde munai 20 paiyzǵa jýyq arzandady.
Eýropanyń munai naryǵynda baǵa tómendegennen keiin Resei munaiynyń rýblmen qoiylǵan baǵasy da túse bastaǵan. Reuters agenttiginiń habarlaýynsha, dúisenbi kúni spot-rynokta reseilik Urals munaiynyń bir barreliniń baǵasy 52,82 dollarǵa deiin tómendegen. Bul 2019 jylǵy 2 qańtardan bergi kezeńdegi eń tómengi kórsetkish.
Munai baǵasynyń quldyraýyna álemdegi eń iri munai importeri sanalatyn Qytaidyń tutynatyn munai kólemine osy elde taraǵan koronavirýs áser ete me dep qaýiptenetin investorlardyń alańdaýshylyǵy sebep bolyp otyr dep jazady "Kommersant" basylymy.
