10 اقپان كٷنٸ رەسەيدٸڭ Urals ماركالى مۇنايىنىڭ بٸر باررەلٸ 3,4 مىڭ رۋبلدەن تٶمەن باعامەن ساتىلدى. بۇل - سوڭعى ەكٸ جىلداعى ەڭ تٶمەنگٸ كٶرسەتكٸش, دەپ حابارلايدى ازاتتىقتىڭ ورىس قىزمەتٸ.
ساۋدا بارىسىندا بٸر باررەل مۇنايدىڭ باعاسى 2,6 پايىزعا, ياعني 3390 رۋبلگە دەيٸن تٶمەندەپ, 2018 جىلى 15 اقپانداعى شاماسىنا دەيٸن تٷستٸ. رەسەي مۇنايىنىڭ باعاسى تٶرتٸنشٸ اپتا بويى ٷزدٸكسٸز تٶمەندەپ كەلەدٸ, وسى ۋاقىت ٸشٸندە مۇناي 20 پايىزعا جۋىق ارزاندادى.
ەۋروپانىڭ مۇناي نارىعىندا باعا تٶمەندەگەننەن كەيٸن رەسەي مۇنايىنىڭ رۋبلمەن قويىلعان باعاسى دا تٷسە باستاعان. Reuters اگەنتتٸگٸنٸڭ حابارلاۋىنشا, دٷيسەنبٸ كٷنٸ سپوت-رىنوكتا رەسەيلٸك Urals مۇنايىنىڭ بٸر باررەلٸنٸڭ باعاسى 52,82 دوللارعا دەيٸن تٶمەندەگەن. بۇل 2019 جىلعى 2 قاڭتاردان بەرگٸ كەزەڭدەگٸ ەڭ تٶمەنگٸ كٶرسەتكٸش.
مۇناي باعاسىنىڭ قۇلدىراۋىنا ەلەمدەگٸ ەڭ ٸرٸ مۇناي يمپورتەرٸ سانالاتىن قىتايدىڭ تۇتىناتىن مۇناي كٶلەمٸنە وسى ەلدە تاراعان كوروناۆيرۋس ەسەر ەتە مە دەپ قاۋٸپتەنەتٸن ينۆەستورلاردىڭ الاڭداۋشىلىعى سەبەپ بولىپ وتىر دەپ جازادى "كوممەرسانت" باسىلىمى.
