Resei men Belarýsqa eskporttaýǵa jáne importtaýǵa tyiym salynǵan taýarlardyń nusqaýlyǵy shyqty. Bul týraly óziniń Facebook paraqshasynda Saýda jáne integratsiia ministri Baqyt Sultanov jazdy, dep habarlaidy "Ult aqparat".
«Resei men Belarýsqa birqatar eldiń sanktsiia engizýinen keiin kásipkerler kóptegen suraqqa tap bolady. Máselen, belgili bir ónim nemese bankke sanktsiia engizilýi múmkin be jáne t.b. Bul másele tek osy elderge qazaqstandyq ónimderdi eksporttaýda ǵana emes, jalpy ózekti bolyp otyr.
Biz búkil álemmen erkin saýda jasaimyz, al biryńǵai kedendik aimaq jaǵdaiynda taýarlar aǵyny barynsha jeńildetilgen. Sondai-aq, Qazaqstan arqyly Resei men Belarýs elderine baǵyttalǵan taýarlar kóptep keledi. Endigi mindetimiz – reeksport qaýpine bailanysty sanktsiia salǵan elderdiń «erekshe nazaryna» túsip qalmaý.
Sondyqtan, kásipkerlerge yńǵaily bolý úshin Premer-Ministrdiń tóraǵalyǵymen Jedel shtab bizneske arnalǵan «nusqaýlyqty» qurý týraly sheshim qabyldady: memlekettik organdardyń resmi saittarynan bir saitta – Resei Federatsiiasy men Belarýs Respýblikasyna eksporttaýǵa jáne importtaýǵa tyiym salynǵan taýarlardyń tolyq tizimin jinadyq.
Jańa derekter paida bolǵan kezde aqparat jańartylyp otyrady. Sonymen qatar saitta elderdegi geosaiasi táýekelderdiń joǵary ekenin eskere otyryp, naryǵynan ketýge sheshim qabyldaǵan halyqaralyq kompaniialardyń tizimi jariialanǵan.
Bul kompaniialardy Qazaqstanǵa tartý týraly máselege kelsek, Qazaqstanda biznes ashý jáne júrgizý úshin jaǵdailar postkeńestik keńistiktegi eń qolailylardyń biri bolyp tabylady. Bul óz kezeginde naqty sektorda investitsiialardyń ósýine jáne jańa óndiristerdiń ashylýyna yqpal etedi. Al bul Memleket basshysynyń úkimet aldyna qoiǵan negizgi mindetteriniń biri. Sondyqtan Qazaqstanda óz óndirisin ashqysy keletin kez kelgen kompaniia investorlar úshin qoljetimdi jeńildikterdiń tolyq spektrin paidalana alady», - delingen Baqyt Sultanovtyń jazbasynda.
