S-350 zenit kesheni
Ýkrainanyń ásker, konversiia jáne qarýsyzdaný ortalyǵy direktorynyń orynbasary Mihail Samýs Reseidiń Qyrymǵa S-350 zenit-zymyran keshenin ákýdegi maqsaty Ýkrainanyń Qara teńizdegi "Neptýn" zymyran keshenine nysana kórsetip turatyn "Bairaktardy" atyp túsirý dep sanaidy. Ol bul jóninde Krym.Realii-ge bergen suqbatynda aitty, dep habarlaidy Azattyq.
- Meniń oiymsha S-350 "Bairaktardy" kóre alady,"Bairaktar" da, "Akinchi" ekeýi ushqyshsyz ushatyn úlken apparattar. Batys tehnologiiasy paidalanylýy múmkin bul jańa keshendi sol úshin jiberip otyr, – deidi Samýs.
Alaida, kei áskeri sarapshylar "Vitiazdyń" múmkindigine kúmándanady. Olardyń sózinshe, áýe kúshterine qarsy qarýlardyń, ásirese Resei qarýlarynyń eń álsiz tusy - áreń baiqalatyn nysanalardy anyqtai almaitynynda. Al qazirgi drondar barynsha baiqalmaityndai etip jasalǵan.
"Túrikterdiń "Bairaktary" sekildi qazirgi zamanǵy drondar meilinshe kórinbeidi. Olardy atyp túsirý úshin radiolokatsiia stantsiialary kórýi kerek. Ol óte qiyn", – deidi Reseidiń áskeri sarapshysy Iýrii Fedorov Krym.Realii-ge aitqan pikirinde.
Reseidiń Ońtústik áskeri okrýginiń qolbasshysy Aleksandr Dvornikov biyl qarashanyń bas kezinde jańa býyndaǵy S-350 zenit kesheni kóp uzamai Qyrymǵa jetkiziletinin habarlaǵan.
Onyń sózinshe, qazir Qyrym túbegindegi Resei áskeri áýe kúshteri men áskeri áýe qorǵanysy kúshteri 100 paiyz sońǵy áskeri tehnologiiamen jabdyqtalǵan.
S-350 "Vitiaz" – Reseidiń zenit-zymyran áskerine arnap jasalǵan kóp arnaly, orta qashyqtyqqa ushatyn utqyr zymyran júiesi. Keshen aerodinamikalyq jáne ballistikalyq qarýlarmen kúreske arnalǵan. Keshenniń bir qurylǵysynda 12 zenit zymyran bar.
"Vitiaz" 60 km jerdegi nysanany joia alady. Qyrymda Reseidiń "S-400" kesheni de bar, ol 400 km-degi nysanany joia alady.
Ýkraina qorǵanys ministri Aleksei Reznikov kelesi jyly da Ýkrainanyń Túrkiiadan "Bairaktar" ushqyshsyz keshenin satyp alýdy josparlap otyrǵanyn aitqan bolatyn. 26 qazanda Ýkraina qarýly kúshteri "Bairaktardy" Donbass mańynda qoldanyp kórgen.
Túrkiianyń ushqyshsyz basqarylatyn "Bairaktar" apparatyn 2020 jyly kúzde Ázerbaijan Taýly Qarabaq janjalynda qoldanǵan. Sarapshylar "Bairaktar" Qarabaq konfliktisinde Ázerbaijannyń áskeri kúshine eleýli yqpal etti dep sanaidy. Osy konfliktiden keiin Ýkraina Túrkiiadan "Bairaktardy" satyp ala bastaǵan.
