Resei quramasy sportshylary 2018 jyly Ońtústik Koreianyń Phenchhan qalasynda ótetin HHIII qysqy Olimpiada oiyndaryna óz eli atynan qatysa almaidy, dep habarlaidy "Ult aqparat".
Halyqaralyq Olimpiada komiteti Lozannada (Shveitsariia) ótken arnaiy otyrysta osyndai sheshim qabyldap, resmi saitynda jariialady.
"HOK-tyń atqarýshy komiteti Samýel Shmidtiń baiandamasyn maquldaǵan soń Reseidiń Olimpiada komitetin shettetý týraly sheshim qabyldandy, sheshim jedel túrde kúshine enedi", - delingen habarlamada.
Osyǵan deiin HOK Reseidi 2014 jylǵy Sochi Olimpiadasy kezinde doping synamalaryn aýystyrdy dep aiyptaǵan. Sondai-aq, Reseidiń Olimpiadalyq komitetine 15 million dollar aiyppul salǵan.
Endi Resei quramasy Ońtústik Koreianyń Phenchhan qalasynda ótetin qysqy Olimpiada oiyndarynda jarysqa OAR (Olympic Athlete from Russia) degen ataýmen Olimpiada týy astynda qatysa alady. Aq Olimpiada kezinde olarǵa Resei ánurany men týyn qoldanýǵa tyiym salynady.
HOK sheshimimen RF vitse-premeri Vitalii Mýtko Olimpiada oiyndaryna qatysýdan ómir boiyna shettetildi.
Esterińizge sala keteiik, Phenchhandaǵy qysqy Olimpiada oiyndary 9-28 aqpan aralyǵynda ótedi.
