RF Prezidenti Vladimir Pýtin Úkimet múshelerimen ótken jiyndy asha otyryp, Reseide koronavirýs infektsiiasyna qarsy vaktsina álemde alǵashqy bolyp tirkelgenin málimdedi. Bul týraly "Ult aqparat" TASS-qa silteme jasap habarlaidy.
«Meniń bilýimshe, búgin tańerteń jańa koronavirýs infektsiiasyna qarsy álemdegi alǵashqy vaktsina tirkeldi», - dedi Prezident.
Pýtin Densaýlyq saqtaý ministrliginiń basshysy Mihail Mýrashkodan osy týraly tolyǵyraq málimet berýin surady.
«Men onyń aitarlyqtai tiimdi jumys istep jatqanyn bilemin, immýnitetti aýrýǵa qarsy etip qalyptastyrady. Qaitalaimyn, ol barlyq qajetti tekserýlerden ótti», - dedi ministr.
Budan buryn M.Mýrashko RF Densaýlyq saqtaý ministrligi N.F. Gamaleia atyndaǵy ulttyq epidemiologiia jáne mikrobiologiia zertteý ortalyǵy jasap shyǵarǵan ekpeniń klinikalyq synaqtan ótkenin málim etken bolatyn.
Pýtin atap ótkendei, Reseide tirkelgen koronavirýsqa qarsy vaktsinany jappai shyǵarýdy taiaý ýaqytta bastaý qajet. Biraq ony egý erikti túrde júzege asyrylmaq.
«Biz taiaý ýaqytta jappai shyǵara bastaimyz dep úmittenemin, eń bastysy osy», - dedi ol.
Sondai-aq RF basshysy ýaqyt óte kele álemde koronavirýsqa qarsy kóptegen vaktsina paida bolatynyna úmit bildirdi.
Aita keteiik, 1957 jyly alǵash ushyrylǵan jasandy Jer serigine uqsastyǵyna bailanysty koronavirýsqa qarsy tirkelgen álemdegi alǵashqy vaktsina "Spýtnik V" dep atalǵan.
"Spýtnik-1" álem boiynsha ǵaryshtyq zertteý belsendiligin arttyrdy. Reseilik COVID-19 virýsyna qarsy jańa vaktsina da álemdik qaýymdastyq úshin "Spýtnik" siiaqty áser etti. Sondyqtan da osyndai salystyrý vaktsinaǵa "Spýtnik V" ataýyn berdi, delingen vaktsina ataýyna qatysty taratylǵan habarlamada.
Resei prezidentiniń aitýynsha, onyń qyzdarynyń biri jańa vaktsinanyń áserin bastan ótkergen.
18 maýsymda bastalǵan klinikalyq synaqtar eki aidan az ýaqytqa sozyldy. COVID-19-ge qarsy alǵashqy vaktsinany 38 erikti ózine saldyryp, synap kórdi. Eksperimentke qatysýshylarǵa júrgizilgen zertteý nátijeleri immýnitettiń damyǵanyn kórsetken.
Alaida, vaktsinany jasaýshylar bul barlyq adamdarǵa jarai bermeitinin eskertedi. Óitkeni, sozylmaly aýrýlary bar adamdarda bul keri áserin tigizýi múmkin.
