Bishkektegi Resei elshiligi ǵimaraty
Reseidiń Qyrǵyzstandaǵy elshiligi óz Telegram-arnasynda Ýkrainadaǵy soǵysta Qyrǵyzstannan shyqqan jigittiń qaza tapqanyn rastady, dep habarlaidy Azattyq.
"Ýkrainany demilitarizatsiialaý jáne denatsifikatsiialaý boiynsha arnaiy áskeri operatsiia kezinde, iaǵni áskeri tapsyrmany oryndaý barysynda Qyrǵyzstannan shyqqan Resei azamaty, Resei Federatsiiasy qarýly kúshteriniń kelisim-shartpen qyzmet etetin qatardaǵy jaýyngeri Dorboev Egemberdi Beqqazymovich erlikpen qaza tapty" delingen habarlamada.
Diplomatiialyq mekeme qaza tapqan azamattyń týystaryna kóńil aitty. Reseidiń kei aqparat quraldary Dorboev 8 naýryzda qaza tapqan dep jazdy.
17 naýryzda áleýmettik jelide Ýkrainadaǵy soǵysta qyrǵyz jigittiń qaza tapqany týraly aqparat tarady. Qoldanýshylardyń biri tanystarynyń balasy, Resei armiiasynda tórt aidan beri qyzmet etip júrgen 19 jastaǵy jigit opat boldy dep jazdy.
Onyń aqparatyna sensek, jigit 22 aqpanda týystaryna qońyraý shalǵan, al 8 naýryzda Reseide jumys isteitin anasyna ulynyń qaza bolǵanyn estirtip, denesi Reseidiń Qyrǵyzstandaǵy Kant áýe bazasyna jóneltiletinin aitqan. Keiin osy derekti jazǵan adam postty jeliden alyp tastady.
22 naýryzda belgili bolǵan aqparatqa qaraǵanda, Egemberdi Dorboev Ystyqkól oblysynda týyp-ósken. Muny Azattyqtyń Qyrǵyz qyzmetine Ystyqkól aýdany Qaraoi aýylynyń basshysy Erlan Jumekov aitqan.
"Máiitti áli ákelmedi. Ákesi osynda. Jigit 2002 jyly týǵan, Resei azamaty. Basqa aqparat joq" dedi Jumekov.
Qyrǵyzstannyń sońǵy resmi deregi boiynsha, eldiń 1 mln 118 myń azamaty shetelde jumys isteidi, sonyń bir milliony – Reseide.
Beiresmi aqparat boiynsha, 400-500 myń qyrǵyzstandyq Resei azamattyǵyn alǵan.
