Resei dollarǵa táýeldilikten birtindep arylyp keledi. Bul jóninde jýrnalisterge memlekettik dýma spikeri Viacheslav Volodin málimdedi, dep habarlady Sputnik RIA Novosti agenttigine silteme jasap.
"Mysaly, bizde EAEO aiasynda ulttyq valiýtada esep aiyrysý 74%-ke deiin ósti. Qytai jáne Túrkiiamen ulttyq valiýtadaǵy saýdany da josparly túrde arttyryp jatyrmyz", - dedi ol.
Tómengi palata spikeri aqpan aiynyń sońynda Resei Ulttyq ál-aýqat qory qarajatynyń valiýtalyq qurylymyn ózgertip, oǵan japon ieni men qytai iýanin qosqanyn eske saldy. Volodinniń aitýynsha, AQSh dollary men eýro úlesi 45%-ten 35%-ke deiin tómendese, fýnt sterling úlesi 10% deńgeiinde qaldy.
Buǵan deiin Federatsiia keńesiniń tóraǵasy Valentina Matvienko RIA Novostige bergen suqbatynda amerikalyq dollar Reseidegi ainalymda qalatynyn, biraq ekonomika oǵan táýeldi bolmaitynyn málimdegen bolatyn.
Federatsiia keńesiniń spikeri reseilik altyn valiýtaly rezervtiń dollarǵa táýeldiligi baiaǵydai úlken emes ekenin eske saldy. Biraq sońǵy on jylda Máskeýdiń Amerika Qurama Shtattarynyń memlekettik mindettemelerine salymy da 30 ese qysqardy.
SIM basshysynyń orynbasary Sergei Riabkov Blýmberg agenttigine bergen suqbatynda Resei kez kelgen operatsiialar boiynsha dollardyń yqpalyn qysqartýy kerek ekenin basa aityp, "táýeldilikten qutylý kerek" dep málimdedi.
